Бугюн, 7-нчи мартда, печатны ва маълумат агентликни янгы ёлбашчысын журналистика тармакъда чалышагъанлар булан таныш этди. Алдындагъы гюн Дагъыстанны Башчысы Сергей Меликов къол салгъан указында агентликге Арсен Юсупов ёлбашчылыкъ этежек деп билдириле.

Арсен Къазимагьамматовични яхшы таныйбыз, ишин билебиз, неге десе ол гьали болгъанча Этномедиахолдинг «Дагестан» къурумну башчысы болуп ишлеп тургъан. Бизин «Ёлдаш» газетибиз де шо холдингге гире.

Дагъыстанны Башчысыны ва Гьукуматыны администрациясыны ёлбашчысыны заместители, маълумат управлениени ва ДР-ны Башчысыны прес-къуллугъуну ёлбашчысы Рашит Акавов журналистлеге Арсен Юсуповну аян этди, огъар салынгъан борчланы гьакъында айтды, талаплар гючлю экенин эсгерди. Агетликни алдагъы ёлбашчысына баракалла сёзлер де айтды.

Ондан алда печатны ва маълумат агентликни уьч йылны узагъында башчысы болуп тургъан Абдуразакъ Жамалутдиновгъа оьзюмню атымдан ишинде этген гьаракаты учун баракалла айтма сюемен. Абдуразакъ Абдулвагьабович намуслу, сёзюнде табылагъан, адамлар булан гелишип иш къурма болагъан, эргиши хасиятлы адам ва аслусу – ишин оьр даражада кютеген касбучу. Огъар гележекде янгы къуллугъунда уьстюнлюклер ва энниден сонг да халкъ учун белсенип чалышмакъны ёрайман.

Сергей Алимович печат ва маълумат агентликге янгы ёлбашчы сайлагъаны да негьакъ тюгюл экенине инанаман. Арсен Юсупов топлагъан сынаву булан тармагъыбызны оьсювюне оьзюнден болагъанны этежекге, мухбирлени алапаларын артдырмакъгъа, эсги болгъан бинабызны янгыртмакъгъа ва гёз алгъа тутулгъан оьзге ишлени оьр даражада кютежекге сёз бере. Оьзюне бу жаваплы къуллукъну тапшургъан Дагъыстанны Башчысы Сергей Меликовгъа баракалласын билдире.

«Ёлдаш» газетни баш редактору Азиз Мичигишев.