Абдулмуслим АБДУЛМУСЛИМОВ:

Март айны ахырынчы гюнюнде Магьачкъаладагъы вокзалгъа Белгород областдан 500-ден артыкъ яш гелди. Шоланы къаршылай туруп, Дагъыстанны Гьукуматыны председатели А.Абдулмуслимов: «Оьзюгюзню уьюгюзде йимик гьис этигиз», –  деди.

 

Сонг журналистлеге баянлыкъ бере туруп, гелгенлер аслу гьалда яшлар уьч ерде ерлешежекни айтды.

– Бизге дос Белгород областны юртларын киевли миллетчилер атышывгъа тутгъанда, Сергей Алимовични тапшурувуна гёре яшланы къабул этмек деген масъала арагъа чыкъды, – дей А.Абдулмуслимов. – Дагъыстангъа узатагъанлары ва муаллимлери булан 600 адам гелген, шоланы 536-ву – охувчу яшлар. Олар туражакъ ва билим алажакъ ерлер гьазир. Бюджетде шо ишлеге харжлар да гёрсетежекбиз, маячылар да оьз кёмегин этелер. Биз оланы къуванчлы кюйде къаршыладыкъ, къалгъан яны да арив болажакъ.

Оланы къаршылама чыкъгъан волонтёрлар, «Алдынлылар» деген яшланы гьаракатыны ортакъчылары гюллер, тюрлю тюслю шарлар ва «Хошгелдигиз Дагъыстангъа» деген баннерлер булан къаршылады.

Гелген делегацияны ёлбашчысы, Белгород областны Комсомольский деген школасыны директору Людмила Тарасова къабул этген кюйге бек рази къалды.

– Бизин бек исси къаршылады, 287 яш «Солнечный берег» деген Избербашдагъы лагерде, къалгъанлары Магьачкъаладагъы ва Дербентдеги школа-интернатларда ерлешдирилежек. Биз мунда янгыз ял алып турмажакъбыз, яшланы охувун да узатажакъбыз.

Озокъда, къонакълар гелгенче, эсгерилген ерлерде оланы къабул этмек учун гьазирлик гёрюлген эди. Охувдан къайры да яшлагъа, экскурсиялар болажакъ ва шатлы тюрлю-тюрлю чаралар да оьтгерилежек.

Дагъыстанны Башчысы Сергей Меликовну атына гелген кагъызда Белгород областны губернатору Вячеслав Гладков баракалла билдирген.

 

Бизин мухбирибиз.