Россияны Ахтарыв комитетини Дагъыстан ахтарыв управлениеси Къызылюрт район жыйынны депутаты Гьайбулла Малачиевге къаршы уголовный иш ачгъан.
Ахтарывчулар токъташдырагъан кюйде, Гь. Малачиев гетген йылны март айында фермер хозяйстволаны бир нече башчыларына: «Сизге пачалыкъны янындан къошум гьакълар тийишли ва шоланы алмагъа кёмек этежекмен»,– деп билдирген болгъан. Макюрчю фермерлени гьарисине банкда янгы карталар ачмагъа ва тийишли документлени гьазирлемек учун паспортларын гелтирмекни тилеген.
Республиканы юрт хозяйство министерлигинде Гь. Малачиев гелтирген кагъызлагъа шеклик этмегенлер ва арадан эки ай оьтюп, фермерлени атына умуми кюйде алгъанда 5 миллион манат бакъдырылгъан. Депутат шо акъчаны толу кюйде оьз пайдасына харжлагъан.
Россияны Уголовный кодексине гёре, суд Гь. Малачиевни 10 йылгъа ерли эркинликден магьрюм этмеге бола. Урлангъан акъчаны къайтарагъандан къайры, огъар дагъы да 1 миллион манат къоду тёлемеге тюшежек.
Алав АЛИЕВ.
