Дагъыстанны ашлыкъ оьсдюрювчюлери бюртюклю гюзлюклени тюшюмюн белгиленген болжалланы ичинде тас этивлеге ёл бермейли тамамламакъ учун юрюлеген гьаракатын гюнден-гюнге гючлендире-гени ачыкъ болуп гёрюне. Бу йыл республикабызда 95 минг гектаргъа чачылгъан гюзлюклени гьар гектарындан орта гьисапда 25 центнер тюшюм къайтармагъа умут этилине.

 ДР-ни юрт хозяйство ва сурсат министерлигини прес-къуллугъу билдиреген кюйде, къыставуллу гюнлерде заманны гьар сагьаты асувлу кюйде пайдаландырыла. Ашлыкълар орулуп битген авлакъларда саламны тайлагъа къысыв ва шолай да сюрюв ишлер оьтгериле. Гелеген йылны тюшюмю учун гюзлюклени чачывгъа гьазирлик гёрюле.

Мол тюшюмлер къайтармакъ учун юрюлеген гьаракатда Къарабу-дагъгент, Буйнакск, Хасав­юрт, Бабаюрт ва Ногъай районланы ашлыкъ оьсдюрювчюлери борчларына бажарывлу кюйде янаша.

Къарабудагъгент районда гюзлюклер бу йылны тюшюмю учун 13 минг гектар майдангъа чачылгъан эди. Буссагьатгъы вакътиде гюзлюклени тюшюмюн къайтарыв эсгерилген районну авлакъларында ахырынчы гектарларда юрюлюп тура. «Гьусейнов» деген сабанчы-фермер хозяйствода ва «Къурбуки» деген кооперативде оьсдюрюлген ашлыкълардан мол тюшюмлер къайтарыла. Орув ишлерде савлай районда 40 комбайн къуршалгъан.

Савлай республикабызда буса 400-ге ювукъ комбайн бу йыл гюзлюк ашлыкълардан 230 минг тонгъа ювукъ тюшюм къайтармагъа ярышгъа чыкъгъан эди.

Озокъда, шо натижа булан рес­публикабызны къоллавчуларын ашлыкъ булан толу кюйде таъмин этмеге бажарылмай. Республикабызны базарларына ашлыкълар, сатып ёл алып, тышдан гелтириле ва шо саялы алывчулагъа багьа олтура. Дагъыстанлы къоллавчуланы баш азыгъы булан толу кюйде таъмин этмек учун 500 минг тон будай оьсдюрмесек бажарылмай.

Муна шо саялы да, гележекде сайламлы урлукъланы чачып мол тюшюмлер къайтармакъ учун сюрюлеген майданланы толу кюйде ишлетивге де тергевню гючлендирмеге герек. Неге тюгюл де, Темиркъазыкъ-Кавказ федерал округунда оьзюнде лап да кёп адамлар яшайгъан респуб­ликабызда баш азыгъыбызгъа бакъгъан якъда талапларыбыз йылдан-йылгъа артып тербей. Бюртюкден баш бола, башдан аш бола. Республикабызны ашлыкъ оьсдюрювчюлерине, ДР-ни юрт хозяйство ва сурсат министерлигини оьсюмлюкчюлюк управлениесини касбучуларына да шо гьакъда унутмагъа тюшмей эди.