Биз алда да эсгергенибиз йимик, Къызылюрт шагьарда ерлешген инчесаниятны яшлар учунгъу школасында хореография, сурат этив ва музыка бёлюклери иш гёре.

Биз гиччи заманда аргъанчы бар эди Бурлият деп (Аллагь рагьмат этсин). Бурлият Такъаева ёлдашы аргъанчы Гьасан да булан кёп-кёп тойланы ва жыйынланы кютген. Той болагъан ерде Бурлият бажив гёрюнсе, бары да биле эди шо гюн ол мунда юрюлеген гьаракатгъа аргъанын тартып, жаваплы кюйде янашагъанны.

Бурлият Гьабитовнаны Къызылюрт шагьарда чы нечик де, гьатта Солтан Янгыюрт, Шавхал Янгыюрт ва оьзге юртларда да аргъаныны сеси чалынмагъан нагагь ожакъ да ёкъдур десе дурус болур.
Бурлият Гьабитовнаны къызыны къызы Мадина да инчесаният школасында хореография бёлюгюнде ишлей. Бугюн биз ону гьакъында айрыча лакъыр юрютме сюебиз.

Бираз алдын Магьачкъала шагьарда ерлешген М.Горькийни атындагъы Пачалыкъ республика рус драма театрында ДР-ни Гьукуматыны йылда бир керен берилеген «Душа Дагестана» деген савгъатына лайыкълы болгъанланы савгъатладылар. Оланы арасында Къызылюрт шагьарда ерлешген инчесаниятны яшлар учунгъу школасыны дарс беривчюсю Мадина Рамазанова да бар. Эсгерилген савгъатны ДР-ни маданият министерлигини янында халкъ яратывчулугъуну республика уьюню директору Марита Мугьатова шатлы гьалда тапшургъан.

Бу чарада Мадина оьзю ёлбашчылыкъ этеген яшланы хоруну коллективи де ортакъчылыкъ этди.

Тюзюн айтмагъа герек, Мадинаны гьаракаты негьакъ болмагъан. «Гьаракатгъа – берекет» дегенлей, ону гьаракаты оьр къыйматгъа лайыкълы болгъан. Ол ортакъчылыкъ этмеген шагьарда дав-патриот, маданият ва башгъа чаралар ёкъ демеге ярай. Дейгеним, бу гьаракатчы жагьил къатын оьзю юрютеген чаралар жанлы кюйде оьте.