2018-нчи йылны январ айыны 29- нда хозяйство ёлбашчы, жамият чалышывчу ва Уллу Ватан давну ортакъчысы Идрис Гьасанович Идрисов гечинген.
Идрис Идрисов 1922-нчи йыл 9-нчу майда Дагъыстанны Хасавюрт районуну Яхсай юртунда тувгъан. Асгер къуллукъгъа чакъырылгъынча Кёстек юрт школаны муаллими болуп ишлеген.
1940-нчы йылда Къызыл Армиягъа чакъырыла. Ватан давну къыйынлы йылларындан оьтюп, Уьстюнлюкге етишивде кёп къошум этген.
Тюрлю-тюрлю йылларда Идрис Идрисов Хасавюрт шагьарда уллу хозяйство предприятиелени директору болуп ишлеген, Хасавюрт рай-исполкомну председатели этилип сайлангъан.
Не ерде ишлесе де, Идрис Гьасанович ишине жаваплы янашгъан ва ону ишни яхшы билеген, оьзюне де, башгъалагъа да талаплы янашагъан хасияты болгъан.
Идрис Гьасанович Идрисов уьлкени жамият яшавунда актив кюйде ортакъчылыкъ этген. 30 йылланы боюнда ол ДАССР-ни Оьр Советини депутаты, Хасавюрт район ва шагьар советлени депутатлары этилип сайлангъан.
Идрис Идрисовну къастына пачалыкъны янындан тийишли къыймат берилмей къалмагъан. Ол Ленин, Октябр революция, Загьмат Къызыл Байракъ , Къызыл Юлдуз, Ватан давну орденлери, олай да «Ана топуракъгъа сююв» деген Дагъыстанны эки гьюрметлев белгиси, СССР-ни Оьр Советини Президиумуну, РСФСР-ни Оьр Советини Президиумуну, ДАССР-ни Оьр Советини Президиумуну гьюрметлев грамоталары булан савгъатлангъан.
Ватанны герти патриоту Идрис Гьасанович Идрисовну ярыкъ эсделиги бизин юреклерде даим сакъланажакъ.
Идрис Гьасанович Идрисовну къардашларына, ювукъ адамларына гьакъ юрекден къайгъырышагъанын билдире.
Республиканы ёлбашчы къуруму.
