Хумторкъали районну Къоркъмаскъаладагъы М-З. Баймурзаевни атындагъы школаны 8-нчи класында охуйгъан Хадижа Агъавованы юртлулары оьте пагьмулу къыз гьисапда таный. Ондан сююне, ону пагьмусуна сукълана.
Неге тюгюл, ол гьайран таза тавушлу, оьтесиз арив бийип болагъан, пагьмулу къыз. Оьзюне 5 йыл битгенде, Хадижа Къоркъмаскъаладагъы яшланы инчесаният школасына юрюмеге башлагъан. Ол бир башлап эстрада йырлавгъа, сонг хореография бёлюгюне юрюген.
Гиччи къызъяшны пагьмусу эсгерилген къошум билим береген охув ожакъгъа юрюмеге башлагъан гюнлерден тутуп тергевню тарта. Эстрада йырлав кружокну ёлбашчылары Умлайла Бадиривова ва Зайира Хашидова Хадижагъа тавушун «чарламагъа» кёмек эте, сагьнада оьзюн тутагъан кюйлеге уьйрете…
Инг алда хор булан йырласа да, 8 йылындан тутуп, Хадижа солист гьисапда айрыча йырламагъа башлай. Оьзю гиччи буса да, сагьнаны толтурма бажара. Таза ангы, маъналы йырлары, жанлы бийивю булан къаравчуланы харс урувларын къазана.
Эстрада йырлав кружок булан янаша Хадижа хореография, демек, милли бийивлени кружогуна да юрюй. Къызъяшны пагьмусуна тергев берген ёлбашчысы ону оьзюне кёмекчи этип ала ва огъар 5-6 йыллыкъ гиччи яшланы группасын тапшура. 2021-нчи йылда Хадижа, 5 йыл охуп, Къоркъмаскъаладагъы яшланы инчесаният школасын оьр къыйматлагъа битдире.
Бугюнлерде ол ортакъчылыкъ этмеген, оьзю билим алагъан школада чы нечик де, районда да бир байрам да оьтгерилмей деп айтмагъа ярай. Пагьмулу яш йырав аналагъа, къызардашлагъа, Ватангъа, къурдашлагъа багъышлангъан йырланы кёп сююп йырлай. Сагьнада оьзю айтагъан йырланы сёзлерине де ол артыкъ агьамият берип геле. Яш буса да, макъамгъа салма рагьат деп айтып, маънасыз, осал язылгъан сёзлени сагьнадан йырламагъа ярамайгъанны, касбусуна немкъорай янашагъан адамны иши алгъа бармайгъанны англай.
Бугюнлерде Хадижа оьзю ортакъчылыкъ этеген «Тавланы легендасы» деген ансамблинде хореограф болуп да ишлей. Гиччи къызъяшланы Дагъыстанны милли бийивлерине уьйрете. Гюндюзлер орта школагъа билим алмагъа юрюй, школадан сонг ишине алгъасай…
– Йырав гьисапда да, бийив ансамбли булан да мен кёп керенлер республика оьлчевдеги конкурслагъа баргъанман, савгъатлы ерлеге де ес болгъанман. Шо конкурсланы белгиси гьисапда, кёп санавда грамоталарым да бар. Гележекде мен оьзюмню касбумну яшлар булан, музыка булан байламагъа сюемен. Йыргъа, бийивге пагьмусу булангъы гиччи яшланы охутувгъа, оланы инчесаниятны тармагъында тарбиялавгъа багъышламагъа къастым бар,– дей ол.
Хадижа Агъавова орта билим береген школада да яхшы къыйматлагъа охуй. Инчесаниятгъа багъып, охувну ташлап къоймагъа ярамайгъанны англай. 9-нчу класны битдирип, аттестат алгъан сонг, Магьачкъаладагъы Б. Муратованы атындагъы маданият-ярыкъландырыв коллежни, хореография ва вокал факультетинде охумагъа тюшмеге сюе. Бу гьаракатчы къыз гёз алгъа тутгъан хыялларына етишежекге бир де шеклик ёкъ!
Биз де Хадиджа Агъавовагъа, пагьмунг артсын, юрегингдеги умутларынга етишмеге насип болсун демеге сюебиз!
Нурият ЭНДРЕЕВА,
Къоркъмаскъаладагъы М-З. Баймурзаевни атындагъы школаны муаллими.
СУРАТЛАРДА: Х.АГЪАВОВА; ол сагьнада йыр айтагъан вакъти.
