Июн айны 16-нда Ростовдагъы 1 номерли  ахтарывчу изоляторда туснакъ болжалын  оьтгереген 6 адам оьлтюрюлген.

Ерли маълумат къураллар билдиреген  кюйде, олар шо гече вакъти туснакъ камераны терезесине тутулгъан челтирни бузуп, изоляторну дёртюнчю къабатындан бир-бирине байлангъан  тёшек шаршавланы кёмеги булан ич абзаргъа тюшген. Алданокъ къургъан планына гёре, изоляторну эки къуллукъчусун тутгъан ва гючден сакълагъан. Жинаятчылар агьвалат болгъан ерге тез етишип гелген полицейскийлеге оьзлеге айрыча машинни, савут ва изолятордан  чыкъма ихтияр бермекни талап этген.

Гечге таба оланы барысыны да атлары токъташдырылгъан. Арасында дагъыстанлы  Магьаммат Сайпутдинов да болгъан. Ол 1999-нчу йылда Къызылюрт районну Нечаевка юртунда тувгъан.

Озокъда,  аманлыкъны къоруйгъан къурумларыны да  жинаятчыланы талапларын кютме хыялы ёкъ болгъан.  Тюшден сонг башлангъан къысгъаракъ гьужумда изоляторну къуллукъчулары азат этилген, жинаятчылар буса оьрде де эсгерилген кюйде оьлтюрюлген.

Прокуратура тергевлени башлагъан.

 

Алав Алиев.