Къызылюрт шагьарда билим берив управлениесини янында «Инг яхшы клас ёлбашчы» деген конкурсну биринчи бёлюгю оьтгерилди. Ону ортакъчылары оьзлени яртывчулукъ ишлерин охувчулары да булан малим этдилер. Яшлар оьзлени пагьмуларын бийивлери, йырлары, сагьналашдырылгъан чыгъышлары, гийими, булан гёрсетме болдулар.
Шолайлыкъда, башлапгъы класланы ёлбашчыларыны арасында алдынлылар белгили болду. Ерли конкурсну гьасиллерине гёре 4 номерли орта школаны муаллими Аминат Аскерханова биринчи ерни къазанды. Эсгерилген конкурс билим берив ожакъларда клас ёлбашчыланы абурун, оланы ишини агьамиятлыгъын гётермек муратда оьтгерилди.
Дарс беривчю Аминат Аскерхановагъа «Инг яхшы клас ёлбашчы» деген республика конкурсунда ортакъчылыкъ этмеге имкамлыкъ тувулунду.
Каспийск шагьарда ерлешген республика билим берив центрыны янында конкурсну экинчи тиретинде 35 муаллим ортакъчылыкъ этди. Олар эки гюнню узагъында жюрини ортакъчыларын оьзлени яратывчу гьаракаты булан таныш этди. Конкурсну ортакъчылары педагогика культурасы булан айрыча усталыгъын гёрсетди ва алдынлылар арагъа чыгъарылды. Конкурсну гьасиллерине гёре жюри алдынлы ерлени алгъанланы атларын белгили этди.
Башлапгъы класларда дарс берегенлерден Къызылюрт шагьардагъы 4 номерли орта школасыны муллими, «3» в класны клас ёлбашчысы Аминат Аскерханова экинчи ерни къазанды. Огъар ДР-ни билим берив ва илму министерлигини янындан экинчи даражалы диплом тапшурулду.
Аминат Аскерханова Хасавюрт шагьарда Гьашым Абдулгьамитовични ва Зулфия Абдурагьмановнаны агьлюсюнде тувгъан. 2014-нчю йылда Хасавюрт шагьардагъы педагогика коллежни уьстюнлю кюйде тамамлагъан сонг, Магьачкъаладагъы Дагъыстан пачалыкъ педагогика университетинде оьр билим алмакъ учун охувун давам эте.
2018-нчи йылдан тутуп, Къызылюрт шагьардагъы 4 номерли орта школасыны дарс беривчюсю болуп загьмат тёге. Агьлюсю Умахан булан эки авлетни тарбиялай. Гёресиз, Аминатны къасткъылыву негьакъ болмагъан.
Алибек САЛАВАТОВ.
СУРАТДА: А. Аскерханова.
