Къарабудагъгент райондан Украинадагъы хас асгер гьаракатда кёп адам ортакъчылыкъ эте. Олар къоркъунмай ва тартынмай оьзлеге салынгъан борчланы кюте. Шоланы бириси – Ибадулла Дагьиров.
2022-нчи йылны февраль айыны 24-нде башлангъан хас дав чараны барышында ортакъчылыгъын болдура туруп, ол бир нече керен къоччакълыкъ гёрсетген. Инг де артдагъысы – яралангъанланы оьлюмден къутгъаргъан. Ибадулла Дагьиров яралангъан оьзюню ёлдашын дав майдандан алып чыкъмагъа бажаргъан. Душман оланы автоколоннасына чапгъын этгенде, буланы машини яллай. Шо ерде башгъа батальонда яралангъан яшны машини булан Ибадулла чыгъармагъа ва госпитальгъа элтмеге бажара. Шолай дагъы да къоччакълыкълар ол бир нече керен гёрсетген.
Шо хас асгер чарада ортакъчылыкъ эте туруп, ватандаш ва асгер къуллукъчу гьисапда оьзюню патриотлугъун ва игитлигин гёрсетгени саялы, РФ-ни Президенти Владимир Путинни 2022-нчи йылда 6-нчы августда къол салынгъан Указы булан Ибадулла Дагьировгъа Къоччакълыкъны ордени тапшурулгъан.
Ол уьюне къысгъаракъ отпускагъа гелгенде, игит булан районну башчысы Магьмут Амиралиев ёлукъгъан. Ону савгъаты булан къутлагъан, Ватанына бакъгъан сюювю учун баракалла билдирген. Ол район администрациясыны атындан И.Дагьировну агьлюсюне кёмек болдурмакъны тапшургъан ва не масъала булан да гелме болагъанны билдирген.
Ибадулла Дагьиров 1983-нчю йылда Аданакъ юртда тувгъан. Юртундагъы орта школаны битдирген ва 2013-нчю йылда асгер борчун кютмеге чакъырылгъан. Ол Новосибирск бойларда ерлешген РВСН асгерни бёлюгюнде къуллукъ этген. 2015-нчи йылдан берли Буйнакск шагьарда ерлешген 136 мотострелковый бригадада контрактны кюрчюсюнде къуллугъун башлагъан.
Биз Ибадулла Дагьировгъа, ону булан бирге бары да хас гьаракатда ортакъчылыкъ этеген, Ватанын якълавда къоччакълыкъ гёрсетген уланларыбыз булан оьктем болабыз ва олагъа яхшы савлукъ, насип ва уьстюнлюклер ёрайбыз.
