Магьачкъала шагьарны Совет район судуну къарары булан кикбоксинг ябушувдан Дагъыстанны  жыйым командасыны алдагъы баш тренери Агьмат Агьматов  ва ону бирдагъы ёлдашы халкъара ахтарывгъа берилгенлер.

Судда токъташдырылгъан  кюйде, А.Агьматов 2017-нчи йылда  Къызларда 10 –нчу класда охуйгъан  къызъяшны хорлагъан болгъан ва спорт школаны кассасындан 350 минг манатны урлагъан. Оьзюне къаршы уголовный иш ачылгъанда, Украинагъа къачгъан. Онда ол бандит уьюрлени гюп­лерине къошулуп, Россияны асгерлерине къаршы ябуша. Артдагъы маълуматлагъа гёре А. Агьматов – миллетчилени янын тутуп ябушагъан имам Шамилни атындагъы дагъыс­танлы гёнгюллю батальонну командирини заместители.

Халкъына хыянатчы болуп чыкъгъан адамгъа эрте-геч жавап берме тюшежегине инанмакъ къала. Озокъда, дав майданларда сав къалса.

Алав АЛИЕВ