Пятигорск шагьарда дартс оюндан оьтгерилген Темиркъазыкъ Кавказ федерал округуну чемпионатында дагъыстанлы спортчулар 9 медальгъа ес болгъан.
Шо чемпионатда алдынлыкъ алмакъ учун тогъатартывланы аслу гьалда Ставропол крайны жыйым командасына къуршалгъанлар бизин спортчулар булан юрютген. Тек дагъыстанлы спортчулар оьзлени айрыча бажарыв-лугъун гёрсетген. Ачыкълашдырып айтгъанда, артдагъы йылларда гёрмекли уьстюнлюклени къолда этип турагъан Фирдуси Къасумов алтын медаль къазангъан. Азиз Азизов – гюмюш, Дарбиш Магьамматов буса бронза медальгъа ес болгъан.
Тогъатартывланы жут-жут болуп юрютеген тиретинде де бизин спортчулар медалланы оьзлени арасында пайлагъан. Демек, Фирдуси Къасумов ва Омар Гьажиев – алтын, Азиз Азизов ва Дарбиш Магьамматов – гюмюш, олай да Артур Къазбеков ва Жаватхан Таймасханов бронза медаллагъа ес болгъан.
Оьтгерилген чемпионатда ортакъчылыкъ этген тогъуз да жыйым командаланы арасында юрюлеген тогъатартывларда да бизин спортчулар финал тиретинде алдынлыкъ алгъан. Шолай уьстюнлюклеге къатын-къызлар къуршалгъан бизин республиканы жыйым командасы да етишген.
Б. АЙБОЛАТОВ.
