6-нчы майда белгили алим-тюрколог, язывчу ва публицист Гьасан Магьамматрасулович Оразаев гечинген деген къайгъылы хабар етишди.
Гь. Оразаев 1947-нчи йылны башында Тёбен Къазаныш юртда тувгъан. Юртдагъы орта школаны охуп битген. 1966–1969-нчу йылларда асгер къуллугъун кютген сонг, ДГУ-ну тыш уьлкелени тиллерин уьйретеген факультетине тюшген ва яхшы къыйматлар булан битдирген. Гь.Оразаев 1977-нчи йылдан тутуп, Россияны Илмулар академиясыны Дагъыстан илму центрыны тарихи, археология ва этнография институтунда старший илму къуллукъчу болуп ишлеп турду.
Гьасан Оразаев 350-ге ювукъ илму асарны язып арагъа чыгъаргъан. Шолардан 50-и айры китаплар болуп охувчулагъа етишген. Ол онлар булангъы илму китапланы редактору да болгъан.
Оьзюню яратывчулугъунда уллу алим Абусупиян Акаевни ругь варислигин къумукъ охувчугъа етишдирмекни борч этип, ону «Пайхаммар-ны ёлу булан» деген ат булан 4 томун чыгъарды.
Эндирейли Магьаммат Аваби Акъташини, Умму Камалны, Багъдат Алини, къакъашуралы Абдурагьманны, эндирейли Ташав Гьажини, Санкт-Петербургдагъы император университетни дарс беривчюсю Магьаммат-апенди Османовну, тёбенкъазанышлы алим Билал Алибековну эпсиз бай адабият варислигин ахтаргъан.
Ону макъалалары «Ёлдаш» газетде де кёп чыгъа эди. Биз ону агь-люсюне, дос-къардашларына къайгъырышагъаныбызны билдиребиз! Жаны женнетлерде болсун!
«Ёлдаш» газетни редакциясыны коллективи.
