Арадан нечесе йыллар гетип бир наслулар башгъа наслуланы алышыдырып турса да, 22-нчи июн бизин уьлкени тарихинде лап да къайгъылы тархланы бириси гьисапда къалажакъ. Шо гюн биз Уллу Ватан давну йылларында уьлкебизни якълай туруп, Ватанны алдында борчун кютюп, оьзлени жанларын къурбан этгенлени, фашист лагерлерде къыйынлыкълар гёргенлени, къыйыкъсытылгъанланы, ачлыкъдан оьлгенлени эсге алып къайгъырабыз. Савлай уьлкеде Эсделикни ва къайгъыны гюню белгилене.
Белгили экени йимик, 1941-нчи йылны 22-нчи июнунда, эртен тез, дав башлайгъанын да билдирмей, хапарсыздан фашист Германия Совет Союзгъа чапгъын этген, шагьарланы, юртланы дагъытмакъ учун бомбагъа тутгъан. 1418 гюн ва гече узатылгъан шо давда СССР 27 миллион адамын тас этген, тек душмандан уьстюн гелген.
Шо давда 60 пачалыкъ ортакъчылыкъ этген ва дав агьвалатлар Европаны, Азияны, Африканы топуракъларында, денгизлерде, океанларда юрюлген. Къыйынлы ва къанлы бу давларда бизин асгерлер Европаны халкъларын фашизмден къутгъармакъ учун, гитлерчи армияны тозмакъ учун аслу ва гёрмекли къошум этген. 1945-нчи йылны май айыны 8-нде буса фашист Германия тюп болгъанлыгъына мюкюр болуп къол салгъан. Уллу Ватан даву СССР-ни уьстюнлюгю булан битген.
Совет Союз тозулгъан сонг да шогъар гирген пачалыкълар 22-нчи июнда пачалыкъ байракъларын тёбен тюшюре. Шо къагьрулу давларда жан бергенлени эсге ала. Шо гюн майчыракълар ягъыла, эсделиклеге ва мемориаллагъа гюллер салына, жан бергенлер эсге алына. Бизин уьлкени ёлбашчылары ва гьукуматына къуршалгъанлар, депутатлар, белгили жамият чалышывчулар оьжетли давларда жан бергенлени эсге ала.
Москвада Белгисиз солдатны эсделигине гюллер салына. Эсделикни ва къайгъыны гюнюнде савлай уьлкеде маданият тармакъда, радио-телевидениелерде шатлыкъ программалар токътала. Шо да бир де унутулмажакъ эсделикни гюню пачалыкъ оьлчевде оьтгерилегенин исбатлай.
Бизде Ватаныбыз ва ана топурагъыбыз учун жан бергенлени эсде сакълайбыз. Солдатланы, офицерлени къоччакълыгъы, игитлиги булан оьктем болабыз. Тылда къаныгъывлу кюйде ишлеген къартланы, къатынгишилени, яшланы къайратлы загьматы унутулмай. Бары да жан бергенлени алдында баш иебиз. Игитлеге даимлик макътав болсун!
Н. БАЙБОЛАТОВ.
