Эндирей юртда Дагъыстанны Башчысы Сергей Меликовну ортакъчылыгъы булан янгы спорт къала ачылды. Эгер де алда юртдагъы спортчулар 50 йыллар алда къурулгъан залда машгъул бола эди буса, гьали янгысында оьзлени бажарывлугъун артдыра. Юртда спорт булан машгъул 500 яшгъа юреги ушатагъан секцияда уьйренме имканлыкълар болдурулду.
Юрт депутатланы ахырынчы сессиясында шо спорт къалагъа ат къоюв масъаласына къаралды. Юртдагъы тамазаланы ва яшёрюмлени Эндирей бийликни къургъан белгили асгербашчы ва жамият чалышывчу Солтанмутну атын такъмакъ деген чакъырыву арагъа салынды.
Сессияны ишинде Хасавюрт районну башчысы Арсланбек Алибеков ва орнунбасарлары, Дагъыстанны Халкъ Жыйыныны депутаты Уллубий Абуков, Жамият жыйынны ёлбашчысы Руслан Бийболатов, жагьиллер, ругьанилер ва тамазаланы советини вакиллери ортакъчылыкъ этдилер. Сессияны ача туруп, депутатланы юрт жыйыныны председатели Гебек Къонакъбиев Солтанмутну гьакъында айтды.
Шо масъалалагъа гёре сёйлеген А.Темирханова, А. Арсланханова, З.Зубайыров, Б.Багьатов, З.Идиков, Ю. Сайпутдинов ва башгъалары белгили уланыбызны атын такъмакъ тарбиялавчулар учун да уллу оьктемлик экенни ва чакъырывну якълайгъанны эсгердилер. Солтанмутну гьакъында кёп китаплар чыгъаргъан, Россияны язывчуларыны союзуну ортакъчысы Багьавутдин Гьажаматов да къумукъланы белгили уланыны гьакъында толу кюйде хабарлады.
Депутатлар юртдагъы спорт къалагъа Солтанмутну атын такъмакъны бир гёнгюлден къабул этдилер.
Бизин мухбирибиз.
