Шулай ат булан Дагъыстан китап басмаханада белгили журналист Далгьат Алкъылычевни гезикли китабы чыкъгъан.  «Ёлдаш» газетде бёлюкню редактору, баш редакторну орнунбасары болуп узакъ йыллар ишлеп турду. Ишлеген йылларыны вакътисинде, озокъда, газетде кёп санавда макъалалар, очерклер язып чыгъарды ва къумукъ охувчугъа белгили болду.

Д.Алкъылычев тезде  «Къумукъ театрны тарихинден» деген ахтарыв ишин, «Бусурманны келпети», «Замандашларым» деген китапланы да охувчулагъа етишдирме болду. Ону бу янгы китабында «Очерклер», «Публицистика», «Инчесаният», «Журналистни тептеринден» деген  бёлюклер ерлешдирилген.

«Мен журналист гьисапда чалыша туруп, савлай оьмюрюмню йибергенмен,–деп яза автордан деген баш сёзюнде ол.–Язгъанларымны давамыны экинчи жыйымы «Девюрюмню келпети» деген баш булан печатгъа онгарылды. Бир янындан, йишрманчы асруну ахырынчы, йигирма биринчи асруну башлапгъы йыллары журналист гьисапда мени учун тамаша тюшюмлю болду. Шо Йырчы Къазакъ да айтгъанлай, «Девюр, девюр, питне девюр заманлар» эди. Бизин уллу уьлкебиз, Совет Союз, сонг Россия уллу къыйынлыкълагъа тарыгъан, четимликлени башдан гечиреген заман эди. Шо гьалны бу китапдагъы «Пуб­лицистика» бёлюкге гиреген материалларда охувчу оьзю де гьис этмеге болар деп ойлашаман. Мени архивимде бизен яшайгъан девюрню келпетлейген дагъы да кёп материаллар топлангъан кюйде къалып тура. Шоланы да охувчугъа етишдирме умут этемен», – деп яза автор.

 

Яраш БИЙДУЛЛАЕВ.