Дербентни орамлары янгыртылажакъ
Гагаринни атындагъы орам шагьарны 2 минг йыллыкъ юбилейине гьазирлик гёрюв программагъа гирген. Мунда машинлер юрюйген ёлну генглешдирме, янгы асфальт салмагъа, адамлар юрюйген ёлгъа таш тутмагъа ва ярыкъ береген ясандырывланы, янгур сувлар гетеген гьавузланы янгыртма гёз алгъа тутулгъан. Шолай да, газ ясандырывлар башгъа ерге чыгъарылып, орамны бою яшыллыкълар булан безендирилме герек.
Гагаринни аты къоюлгъан орамда кёп санавда сатыв-алыв тюкенлер, къурулуш материаллар сатылагъан уллу складлар барлыгъы да четимликлер тувдурагъан масъала гьисаплана. Эсгерилген тюкенлер сатагъан малны адамлар юрюйген ерлеге чыгъарып салып пуршавлукъ этегенден къайры да, оланы биналарыны тыш гёрюнюшю де исбатлы тюгюл. М. Рагьимов эсгерилген биналаны есилери булан янгыз оланы тыш гёрюнюшюнден къайры да, эки къырыйындагъы ерни гёрмекли гьалгъа гелтирежекге сёйлешди.
Иш бёлюкню ортакъчылары тергев этген бирдагъы масъала орамда ерлешген биналагъа билдиривлер ябушдурулгъанлыкъ эди. М. Рагьимов бары да билдиривлени биналаны тамларындан тайдырып, билдиривлер учун салынгъан ясандырывланы янгыртмакъны тапшурду. Гагаринни атындагъы орамда янгыртыв ишлер тамамлангъан сонг билдиривлер учунгъу имаратлар шагьарны администрациясындан изну алынып салынажагъы ва олар барысы да бир йимик болмагъа гереклиги гьакъында сёйлешинди.
Дербент шагьарны администрациясыны прес-къуллугъу.