Россияны Ич ишлер министерлигини Темиркъазыкъ Кавказ федерал округдагъы управлениеси Дагъыстан ва Мычыгъыш хоншу республикаланы дазусунда ерлешген «Герзель кёпюр» постда болгъан агьвалатгъа байлавлу тергевлер оьтгерген.

 

Белгили кюйде, шо гюн  постдагъы полицейскийлер  «Кавказ»  федерал ёлдан низамны бузуп, оьзге транспортгъа къоркъунчлукъ тувдуруп, бек чалт гелеген «Юкон» маркалы машинни эс этген. Инспекторлар машинни токътатгъанда  гьайдавчусу документлерин  гёрсетмеге сюймеген, оьзюн бек ачувлу, эдепсиз кюйде тута болгъан ва къачып къутулмагъа къарагъан. Полицейскийлеге гючню къолламагъа тюшген, шо заманда да эсирген болгъан деп ёралагъан гьайдавчу инспекторлагъа бир нече керен урмагъа кюй тапгъан.

Управлениеде билдирегени йимик, тергевлерден сонг,  материаллар Россияны Ахтарыв комитетине бакъдырылажакъ.

Бу агьвалат бары да федерал маълумат къуралланы тергевюн тартгъан. Себеби – низамсыз гьайдавчу генерал-майор, МЧС-ни Мычыгъыш Республикадагъы управлениесини башчысы Алихан Цакаев болуп чыкъгъан.  Ол формасыз ва документсиз, гишини машинине де минип, къаттыгюн Дагъыстанда не эте болгъан деген аслу соравгъа гьали де жавап ёкъ.

Озокъда, Рамзан Къадыровну  къарсалавлу сесленивлерин де  узакъ къаравуллама тюшмеген. Ол Дагъыстанны ёлбашчыларына этген чакъырывунда   апрель айны 14-нде шо постда болгъан полицейскийлени къуллугъундан къувалап чангын чыгъармагъа герек деп язгъан.

Дагъыстанны Башчысы Сергей Меликов огъар­ сабур кюйде:  «Бизин республикалар учун лап къыйынлы мюгьлетлерде, Россиягъа халкъара террорчу къурумланы янындан къоркъунч­лукъ тувулунгъанда,  полицейскийлерибиз  Ватанын, уллу уьлкебизни бирлигин  къоччакъ кюйде къору­гъан, якълагъан эди. Кёбюсю шону учун  жанларын да берди. Полицейскийлени бугюнгю наслусу да законлагъа аркъа таяп, жамиятны, элни пайдасына къуллукъ этелер. Озокъда, болгъан агьвалатгъа тийишли, адилли къыймат берилежегине шекленмеймен ва шо бизин халкъланы заманлар булан сынала гелген  дос, къардаш аралыкъларына бир де пуршав этмежегине инанаман», – деп жавап берген.

Бизин маълумат: Цакаев Алихан 1976-нчы йылда Новогрозненский деген юртда тувгъан. Эки оьр билими бар. Аманлыкъны къоруйгъан къурумлардагъы чалышывун ротаны командиринден башлагъан.  Сонг республиканы ич ишлер министерлигини гьар тюрлю жаваплы къуллукъларында ишлеген. 2021-нчи йылдан тутуп, МЧС-ни Мычыгъыш Республикадагъы управлениесине башчылыкъ эте. Ватаныны алдындагъы къуллукълары учун Къоччакълыкъны дёрт ордени, «Жамият низамны къорувдагъы къуллукълары учун» ва «Игитлиги учун» деген медаллар булан савгъатлангъан. 9 яшны атасы.

 

Алав Алиев.