Бу йыл Дагъыстанны М.Горькийни атындагъы орус драма театры къурулгъанлы 100 йыл тамамлана. Печатны уьюнде шогъар байлавлу оьтгерилген прес-конференцияда ДР-ни маданият министри Зарема Бутаева, орус театрны директору Тимур Магьамматов ва режиссёру Скандарбек Тулпаров оьтгерилежек юбилейни гьакъында хабарлады.

 

«Бу йыл биз республиканы биринчи театрыны юбилейин оьтгеребиз. Биздеги бары да милли театрланы къурулмакълыгъы ва оьсювю орус театрдан баш ала. Башлап театрда ишлейген актёрлар кёп болмагъан. Буса да дагъыстанлы къаравчулар орус театрны биринчи спектакллеринден тутуп англама ва сюйме башлагъан», – деди З.Бутаева.

2022-нчи йылданокъ орус театрны юбилейин оьтгермек учун Дагъыс­танны Башчысы С. Меликов Указгъа къол салгъаны саялы министр огъар баракалла билдирди. Къурум комитет къурулгъанны ва юбилейни оьтгеривню программасы гьазирленегенни гьакъында айтды. Юбилей гьаракатларда «Русская сцена» деген фестиваль оьтгерилежекни, театрны репертуарындан гьар тюрлю спектакллер гёрсетилежекни, интернет торунда флешмоб иш гёрме башлагъанны ва къаравчулар оьзлени сююмлю артистлерин, режиссёрланы ва музыкантланы къутлама болагъанын эсгерди.

Театрны режиссёру Скандарбек Тулпаров юби­лейни программасыны гьакъында айта туруп «Русская сцена» деген фес­тиваль орус театрны коллективини сиптечилиги булан юрюлежекни эсгерди. Дагъыстандагъы бары да театрланы коллективлери ортакъчылыкъ этежегин, оркестр согъуп марш булан юрюжегин, театр асгер горнизонлардан баш алагъанны, биринчи къаравчулары да офицерлени къатынлары болгъанны хабарлады. Фестиваль 1-нчи октябрде башланагъа­нын, юбилей буса 6-нчы октябр­де оьтгерилежегин айта туруп, дав йыллардан сонг болгъан агьвалатланы гьакъында «Пассажирка» деген спектакльни гёрсетежегин билдирди.

Театрны директору Ти­мур Магьамматов айтгъан кюйде, 2015-нчи йыл 7,8 миллион манат къазана болгъан буса, театр йылда гьали 28 миллион манат къазана. Шо да «Пушкин картаны» яхшылыгъындан. Картаны къоллайгъан­ланы санаву йылдан-йылгъа арта. Бу юбилей йылда театр бир айны ичинде Тюмень, Иваново, Калуга, Москва, Владикавказ шагьарлагъа барып спектакллер гёрсетежек.

Ахырында гелген къонакълар журналистлени соравларына жаваплар берди.

 

Я. БИЙДУЛЛАЕВ

СУРАТДА: конференциядан гёрюнюш.