Дагъыстанны Башчысыны борчларын заманлыкъгъа кютеген Владимир Ва­сильевни ёлбашчылыгъы булан 8-нчи ноябрде ДР-ни Гьукуматыны жыйыны оьтгерилген. Жыйында яшавлукъ-коммунал хозяйстволаны 2017–2018-нчи йыллагъа яшавлукъ уьйлеге исив берив сезонуну масъалаларына къаралгъан.

Къурулушланы, архитектураны ва ЖКХ-ны министрини борчларын заманлыкъгъа кютеген Ибрагьим Къазибеков билдирген кюйде, 15-нчи октябрден башлап школалагъа, больницалагъа ва оьзге социал къурумлагъа исив берилме башлагъан. Яшавлукъ уьйлеге Къызларда, Каспийскиде, Магьачкъалада, Южносухокумскиде, Избербашда, Дербентде исив бериле. Ол эсгерген кюйде, коммунал къуллукълагъа акъча тёлемейгенлер кёп. Бу йылны биринчи октябрине газгъа ва токгъа жыйылгъан борч 2 миллиард манатдан да артыкъ. Шо буса гележекде исив, сув ва электрик гюч булан таъмин этивде четимликлер тувдуражакъ. Шону учун ерлерде шо къуллукълагъа тёленеген акъчаны тезликде бир ёрукъгъа салмаса бажарылмай, деген министр.

ДР-ни Гьукуматыны Председателини борчларын заманлыкъгъа кютеген Абдусамат Гьамитов бу тармакъда пачалыкъны янындан да оьзтёрече, айры адамлар гьакъ берип ишлетивню къайдалары нечик къолланагъанны гьакъында сорагъан. Буйнакскиде, Къызылюртда, Южно-Сухокумскиде шо оьзтёрече гьакъ тёлев яхшы ишлейгенин айта туруп, министр Дербент шагьарда шолай къайданы къоллама бажарылмагъанын эсгерген.

Госжилинспекцияны ёлбашчысы Али Жабрайылов эсгерген кюйде, къышгъа гьазирлик плангъа гёре заманында юрюле. Владимир Васильев айтгъан кюйде, Дагес­танские Огни шагьарда яшавлукъ фондну гьазирлиги осал ва шогъар байлавлу чаралар гёрме герек.

«Яшавлукъ-хозяйство объектлерде болма болагъан аварияланы алдын алмакъ учун Магьачкъалада, Дербентде, Дагестанские Огниде, Къызларда имканлыкълар болдурулмагъан. Электрик гюч булан таъмин этивню, ярашдырывну социал якъдан агьамиятлы къурумларында Дербентде, Избербашда, Буйнакскиде, Хасавюртда, Магьачкъалада имканлыкълар болдурулмагъан. Агул, Бабаюрт,Дахадаев, Къазбек, Гьайдакъ, Къызлар, Ногъай ва Тарумов районланы больницаларында да гьал шолай. Ёлдашлар, шо буса – бизин ва ювукъ адамларыбызны савлугъу.

Къызларда, Хасавюртда, Южно-Сухокумскиде, Дагестанские Огниде, Буйнакскиде иситив береген имаратлар толу кюйде эсгиленген ва гьалиги талап­лагъа жавап бермей. Сиз–инспекциясыз. Сизден талап да этилежек. Яшавлукъ фондгъа гиреген масъалаланы сиз, шунда олтургъанлар, чечесиз ва жавап бересиз. Бизден башгъа адам ёкъ. Къоркъунчлукъ гелтиреген масъалалар – бары да бизинки. Гьар шагьарда яшайгъан адамлагъа сувну ким бере, иссиликни ким бере – башгъалыкъ ёкъ. Аслусу, сув да болсун, иссилик де болсун. Шогъар буса биз, гьакимлер, демек, биз барыбыз да жавап беребиз. Бу чакъырыв тюгюл, бу – ишлевню къайдасы. Шогъар гьазир туругъуз.

Биз сёйлешдик. Биз борчларыбызны кютебиз. Биз олтургъан ерлерибизни елемейбиз, гьаллар яхшы янгъа айлансын деп къаст этебиз. Шону учун мен сизден яхшы янгъа алышынывланы къаравуллайман»,–деп билдирген Васильев.

«Дагестанская сетевая компания» деген акционер жамиятны директору М.Гитинасулов хатабалагь болагъан гезиклер учун 12,8 миллион манатгъа онгача имаратлар гьазирлегенин билдирген. 55 бригада онгаргъанны, технология хатабалагьлар болуп къалса, шо бригадаларда 311 адам ва 148 техника ортакъчылыкъ этежекни эсгерди.

В.Васильев законсуз кюйде къурулгъан уьйлени тергевге алма ва электрик гюч учун акъча тёлемейгенлеге закон ёлу булан чаралар гёрме герекни гьакъында айтды.

Савлукъ сакълав тармакъны гьакъында да сёз юрюлдю. Савлукъ сакълав министрни борчларын заманлыкъгъа кютеген Т.Ибрагьимов айтгъан кюйде, Дагъыстан яшлар тувувда алдынлы беш республиканы арасына гире. Аслу гьалда Избербашда, Агул, Кули, Ногъай, Табасаран, Тлярата районларда янгы тувагъан яшланы санаву кёп.

ДР-ни Гьукуматыны борчларын заманлыкъгъа кютеген Председатели А.Гьамитов къурулагъан больницаланы къурулуш ишлерин битдирмек учун Россияны савлукъ сакълав министерлигине, РФ-ни савлукъ сакълавгъа къарайгъан вакилине республикада тувулунгъан гьалны билдирмекни гьакъында айтды.