Бу жумада Хасавюрт районну Чагъаротар юртунда шатлы агьвалат болду. Янгыртылгъан ва мукъаятлы ярашдырылгъан маданият къаланы ачыв оьтгерилди. Шогъар багъышлангъан жыйында Дагъыстанны маданият министри Зарема Бутаева ортакъчылыкъ этди.

Районну башчысы Арсланбек Алибеков шатлы жыйынны ача туруп, маданият къала «Культура» деген федерал хас программагъа гёре ярашдырылгъанны айтды. ­
–Къайсы юртда да маданият къала ачыла буса, о – савлай район учун уллу агьвалат, – дей А.Алибеков. – Гьар маданият къаланы къуллукъчуларыны алдына милли варислигибизни сакълав, ата-бабаларыбызны саниятына яшёрюмлени тартыв, адатланы, къылыкъланы чебер ишлерден таба уьйретив масъалалар салына. Шону учун да маданият къала юртлуланы ял алагъан ери болма тюше. Гелгенде де, айрокъда яшлар оьзлер юреги ушата­гъан кружокларда машгъул болма герек. Ярашдырмай, онгармай туруп, демек, ­онгайлыкълар яратмай туруп, биз шолай талаплар салып болмайбыз. Шону учун да гьали чагъаротарлылагъа бош заманын пайдалы оьтгерме ер бар. Мен дагъы да райондагъыланы атындан Дагъыстанны Башчысы Сергей Меликовну, сизин, Зарема Ажуевна, маданият къаланы онгаргъанлагъа гьакъ юрекден баракалла билдирме сюемен.

Зарема Бутаева оьзюню сёйлевюнде маданият къаланы талаплары булан бирдагъы да таныш этди.

– Маданият бина, айтылгъан масъалалардан къайры да, адамланы пагьмуларын ачагъан ва оланы аян этеген ер болма герек, – дей З.Бутаева. – Бизин уллуларыбыз юрютген саният, йырлар, бийивлер унутула бара, шону учун да ругь байлыгъыбызны артдырма янгыз шулай хас ерлерде болабыз. Дагъыстан маданият буса – ахыры ёкъ байлыкъ. Бизин буса борчубуз – шону сакъламакъ, янгыртмакъ ва наслудан-наслугъа етишдирмек.

Зарема Бутаева, Арсланбек Алибеков, юрт башчы Сулейман Гьажиев ва маданият къаланы ёлбашчысы Даргин Къурбанов ярашдырылгъан ал лентни гесди ва ичинден айланды.

Сонг жыйылгъанлагъа башында «Молодость Дагес­тана» деген пачалыкъ бийив ансамбль де булан концерт гёрсетилди.

Концертни юрюшюнде Зарема Бутаева районда маданият ишлерде оьрлюк­лер гёрсетгенлени савгъатлав да оьтгерди.