Аявлу бизин къатынлар – аналар, къызардашлар, къызлар!

Агьлюню очагъын сакълайгъан, ожакъны-уьйню авур къуллукъларыны аслам пайын кютеген, оьзюгюз булан яшав къургъан эренлени, жаныгъыздан артыкъ сюеген уланкъардашланы ругьландырагъан, яшлагъа асил къылыкъланы уьйретеген сизин гьар заманда да абурлайбыз, алгъышлайбыз, асырайбыз, аяйбыз. Тек яшавну кёп тюрлю авараларына байланып, гьар гюн такрарлап турсакъ да кёплюк этмейген лайыкълы сёзлер сизге айтылмай къала. Шону да биз билмей тюгюлбюз. Шо якъдан алдыгъызда гьюрметни етишдирмегенибизни англап, етип гелеген 8 Март байрамны алдында дюньяда не арив сёз бар буса, барысын да етишдирмеге сюебиз.

Бу байрам − бизин уьлкеде йылны боюнда белгиленип гелеген байрамланы арасында лап да сюйкюмлю ва шат байрамланы бириси. Оьзю де къагьрулу къышны гюнлери битип, гюнню шавлалары ерге етишип, исив бермеге башлагъандокъ белгиленегени де негьакъ тюгюлдюр. Нечик де, дюньягъа сизин булан бирче гелген гёзеллик де, сююв де шолай гьар гюн сайын юреклеге исивюн чача, бизин гьар къайсыбызны да алгъа абат алмагъа талпындыра.

Шондан сонг да, бу байрам, бир де къопдурувсуз айтгъанда, сиз янгыз ожакъда, уьйде тюгюл, гьар тюрлю касбуланы юрюте туруп етишген оьрлюклер булан бирге, жамият яшавда ва агьлю масъалаланы чечивде сиздеги саламатлыкъгъа, рагьмулукъгъа, чыдамлыкъгъа сукъланмагъа борчлу эте.

Шоланы барысын да эсге алып, 8 Март байрам булан къутлай туруп, гьатсыз сюювюгюз учун, яннавурда табылагъаныгъыз учун разилигибизни билдиребиз. Сизге баракалла! Шону булан бирге сизге яхшы савлукъ, насип, кёп-кёп яхшылыкълар ёрайбыз! Сизин гёзлеригизни нюрюн пашманлыкъны югъу бир заманда да япмасын! Сююне яшагъыз, аявлуларыбыз!

 

Редколлегия.