Темиркъазыкъ-Кавказ федерал округуна гиреген регионланы арасында яшавлукъ-экономика тармакъны оьсювюн гьисапгъа алып, алдагъы заманлардан тутуп, бугюнлеге ерли байлавлукъланы беклешдиривге айрыча агьамият бериле.

 

Бай табиаты, ерли маъданлары, дарман отлары, уста ва шолай да бажарывлу адамлары булан танывлу Дагъыстанны ва Ингуш  Республикаланы арасында гьали де базар аралыкълар оьмюр сюреген девюрде янгылыкълагъа байлавлу сынав алышдырывгъа берилеген тергев де ачыкъ болуп гёрюне.

– Кавказ бизин ортакъ отавубуз, айтмагъа сюегеним, оьзтёрече табиат байлыкъларыны арасында дарман отланы гьар тюрлю журалары къаршылаша, – дей Ингуш Респуб­ликаны табиат ва экология министри Саварбек Холохоев. – Гьай аман дагъы, артдагъы йылларда оланы къыйынлашгъан къысматы теренден ойлашмагъа борчлу эте. Къыт болуп барагъан оьсюмлюклерибиз, шоланы арасында дарман отлар да  Къызыл китап­лагъа гийирилегени негьакъ тюгюл. Оланы гьали  айрыча къорулагъаны гележек учун инамлыкъны тувдура.

Озокъда, дарман отланы тас этивлерден къоруп, оьс­дюрюлеген майданларын артдырывда Дагъыстанда топлангъан сынав тергевню тарта. Шону гьисапгъа алып, бугюнлерде биз де къардаш республиканы тармакъ министерлиги булан байлавлукъ тутуп топлангъан сынавдан пайдаланмагъа токъташдыкъ.

Гертиден де, гьалиден 15 йыллар алда хас шагьатнамагъа ес болгъан сонг Дагъыс­танда дарман отлардан чай гьазирлеп чыгъарылмагъа башлагъан эди. Шону сиптечиси гьалиги «ЭкоКавказ» деген компанияны башчысы Айида Шеховцова да  къалгъайлылар булан сынав алышдырывгъа къаршы тюгюл. Арадан оьтген вакътини ичинде дарман отлардан Дагъыстанда гьазирленген чай булан Нью-Йоркда, Лондонда, Стамбулда ва шолай оьзге шагьарларда яшайгъан къоллавчулар да ювукъдан таныш болдулар.

– Гьали-гьалилерде  Дагъыстандан Ингуш Республикагъа  дарман отлардан чай этивню къайдаларын-сырларын уьйретмек учун сынав топлагъан касбучуланы бир гюбю къонакълай барды, – дей ДР-ни табиат байлыкъларыны ва экология министри Александр Зимин. – Эки де якъны арасында болгъан разилешивлеге гёре гележекде узакъ къалмай къардаш республикада дарман отлардан чай гьазирлейген тармакъ предприятие къурулуп пайдаландырывгъа берилежек. Шону учун гележекде  дарман отланы оьсдюрюп хаммал гьазирлейгенлеге де сурсатны къоллавну талапларын, низамын бузмай иш гёрмеге таклиф этилине.

 

Къ. КЪАРАЕВ.

СУРАТА:  «Экокавказ» деген компания дарман отлардан чай гьазирлей.