Гьали-гьалилерде Хумторкъали районну Къоркъмаскъала юртунда Магьаммат-Загьир Баймурзаевни атындагъы школаны кюрчюсюнде «Агьлюню ва школаны арасындагъы лакъыр: масъалалар ва оланы чечивню ёллары» деген темагъа багъышланып ата-аналаны  жыйыны оьтгерилди. Жыйында район администрацияны, жамият къурумланы, дин къуллукъчуланы, оьзге тарбиялавчуланы вакиллери ортакъ-чылыкъ этди.

 

Жыйынны оьтгермекни мурады – ата-аналаны ва педагогика бир-лешивлени  оьсюп гелеген наслуну тарбиялавда ва гьар-бир янындан оьс­дюрювде, яшёрюмлени ва оьрюм яшланы аманлыгъын сакълавда бирге иш гёрювню болдурмакъ эди. Жыйын Россияны ва Дагъыстан Республиканы гимнлерин согъув ва Хумторкъали районну билим берив управлениесини начальниги Магьамматжамил Агъалаевни къутлав сёзю булан башланды. Ол оьзюню сёйлевюнде тарбиялав масъалаларда агьлюню ва школаны  имканлыкълары уллу экени гьакъда айтды.

Жыйынны барышында билим берив проектни ерли бёлюгюню председатели Жалалутдин Закарьяев Президент салгъан му­ратланы ва масъалаланы гьакъында хабарлады.

Хумторкъали район билим берив управлениени методисти Равзанат Дадамова «Агьлю ва школа – тарбиялавда бир ишни юрюте» деген темагъа багъышлап доклад этди. Управлениени начальнигини заместители Батыр Жапаров «Бажарывлу адамны бажарывлу тарбиялав» деген теманы ачыкъ этип хабарлады.

Дагъыстан Республиканы яшёрюмлени масъа­лаларына къарайгъан­ министерлигинде ватандашлыкъ – патриот ва ругькъылыкъда тарбиялав бёлюгюню консультанты Шевкет Къурумов яшавда яшланы интернетден къорувну гьа­къында оьзюню ойларын айтды.  Тёбе посёлокдагъы школаны педагогу-психологу Атикат Асманова да «Агьлюню ва школаны ара-сындагъы лакъыр» деген темагъа доклад этди.

Жыйынны гьасиллерин чыгъара туруп, тарбиялавну масъалаларына байлавлу болуп агьлюню де, школаны да бирликдеги ишин гёрсетеген къарар къабул этилген.

 

Жават ЗАКАВОВ.

СУРАТДА:  жыйындан гёрюнюш.