Къайсыбыз да гьис этеген кюйде, бизин респуб­ликада да, оьзге ерлерде де айрокъда медицинагъа байлавлу халкъара форумлар, конференциялар юрюлегени адатлангъан десе де ярай. Шолар аслу гьалда медицина къуллукъчуланы билимлерин камиллешдирмек муратда да бола. Айтагъаным, бир жума алда Къазахстанны Астана шагьарында Евразияны нейрорадиология советини конференциясы оьтгерилген. Шонда етти пачалыкъдан 130 адам ортакъчылыкъ этген. Шо конференцияда гьалиги нейроонкологияны масъалалары гётерилген, нерваларда  болагъан шишиклени нечик бакъмагъа ва не къайдада аян этмеге болагъанны гьакъындагъы методикалагъа байлавлу  лекциялар юрюлген.  

Шо агьамиятлы билим берив агьвалатда Дагъыстандагъы А. В. Виш­невскийни атындагъы республика клиника больницаны ва Н. М. Кураевни атындагъы яшланы республика боль­­ницасыны врачлары ор­такъчылыкъ этгенлер.

– Биз башмайы булан байлангъан инг де къыйынлы онкология аврувлагъа тергев беребиз. Шонда Бурденкону атындагъы нейрохирургия центрдан, Пироговну атындагъы РНИМУ-дан ва оьзге айтылгъан медицина центрлардан лекция охумагъа касбучулар гелди. Олар янгыз академиклер, профессорлар тюгюл, гьар гюн аврувланы къыйыны булан турагъан оьр билимли,  сынавлу касбучулар, –деп билдирди мультиспиральный компьютер томография кабинетни заведующийи Айшат Караева.

Рентгенолог Русия Гебекова белгилеген кюйде, Астанада юрюлген  конфе-ренцияны къурум­чулары билим берив программагъа  терен маъналы  ва бек бай маълуматланы жыйып,  топлап къурмагъа бажаргъанлар. Лекцияланы аралашдырып практика ва тест къайдада тапшурувлар берип, дагъыдан да пайдасын артдыргъанлар.

– Биз къыйынлы диаг­нозлары булангъы аврувланы нечик бакъма герекни эшитдик, гёрдюк, тюшюндюк. Бизге аркъасюек ва башмайлардагъы аврувланы токъташдырагъан, диагноз салмагъа кёмек этеген аппаратлар булан ишлейгенде негер тергев бермеге герекни мисаллар булан англатдылар. Бизге гьар ерлерден жыйылгъан касбу ёлдашларыбызны, бир-бирибизни  сынавларыбызны къолламагъа имканлыкълар тувулунду. Шо да бизин учун пайдалы ва агьамиятлы,–деп билдирди Русия Гебекова.

Шо Евразия нейрорадиология советни конференциялары Арменияда, Россияда, Къазахстанда, Уьзбекистанда оьтгериле.

 

Паху ГЬАЙБУЛАЕВА.