Асгерде къуллукъ этив, Ватанны аманлыгъын къоруп сакълав мени йимик нечесе оьзгелени де оюна, пикрусуна гёре гьар-бир ватандашны инг сыйлы борчларындан санала ва гьар къайсы заманларда да шолай болуп гелген. Бизин аталарыбыз, уллаталарыбыз нечесе йыллар алъякъда болуп гетген дюнья давларында жанын аямайлы ортакъчылыкъ этгенлер. Олар анадаш Ватанын чапгъынчы душманлардан якълап, къоруп, уьстюнлюк къазана гелгени де тенгсиз къоччакълыкъ ва гьалиги наслулар учун уьлгюлю дарс болуп токътагъаны − гьакъ герти далил.

Бугюнлерде янгыз Капиркъумукъ юртну алып къойсакъ да, уьй-ожакъларын ташлап, доскъардашындан айрылып, къысматын асгер бёлюк бу­лан тыгъыс байлап гьа­лал кюйде къуллукъ этип турагъанлар юзден къолай бар. Олар ушатып, арив гёрюп танглагъан асгер касбусуна берилип, бирлери гёнгюллю кюйде язылып барып, намусун-ягьын сакълап, Украинада намарт миллетчилер юрютюп турагъан дав гьаракатына къаршы туруп, къоччакъ кюйде къуллукъ этелер.

Бу гезик газетибизни охувчуларын мен шо уланланы бир нечеси бу­лан ювукъдан таныш эт­мекни тийишли гёрдюм. Агъа-ини Надыр ва Нюрбек юртда яшайгъан Абулакъ ва Асият Амурхановланы уллу ва татывлу агьлюсюнде тувуп оьсгенлер. Яшланы уллусу 1984-нчю йыл апрель айны 18-нде тувгъан Надыр 2001-нчи йыл юрт школаны 11 класын охуп битдирип, Дагъыстан па­чалыкъ педагогика инс­титутну физкультура факультетине тюше. 2006-нчы йылда асгерге чакъырыла. Алтай крайны Олейск шагьарында къуллукъ эте туруп, старший сержант бола ва къуллугъун узатма Абакангъа бакъдырыла. Бир йылдан къайтгъан Надыр, 2008-нчи йыл контракт байлап, къысматын Россияны армиясы булан байлама токъташа ва Мычыгъыш республиканы Ханкъаладагъы бёлюк-ле­ринде къуллукъ этме башлай.

2013-нчю йылны май айы­ны 20-сында Надыр асгер къуллугъуна намуслу янашагъаны учун бёлюкню командирини буйругъу булан «Къайратлы къуллугъу учун» деген медаль булан савгъатлана.

2014-нчю йыл буланы асгер бёлюгю Къырымгъа йибериле. Асгерлени таъмин этив батальонда машин гьайдавчу-электрикни касбусун уьлгюлю кюйде юрютеген старший сержант Надыр Амурханов хапарсыздан болуп гетген атышывланы натижасында яралангъан ёлдашларын къоркъунчсуз ерге чыгъарып, медицина къуллукъчулагъа тапшурма бажара. Шо йыл март айны 28-нде огъар асгер бёлюкню командирини буйругъу булан «Къырымны къайтаргъаны учун», ноябрни 24-нде буса Россияны Президенти В.В.Путинни Указы булан Суворовну медаллары тапшурула. 2022-нчи йылны сентябр айыны 6-сында ол асгер бёлюкню командирини буйругъуна гёре Россияны Оборона министерлигини «Асгер макътавлугъу учун» деген 2-нчи даражалы медалына да лайыкълы бола.

Оьмюрюню 15 йылын асгерде къуллукъ этивге багъышлагъан Надыр Амур­ханов алдагъы гюнлерде къысгъа отпускагъа ата юртуна гелип, ата-анасын, агьлюсю Жариятны, бирини артындан бири оьсюп,­ торайып гелеген уланлары Нурадилни, Юсупну ва Юнусну сагъынчларын шайлы ба­сылтды, гёнгюн алып сююндюрдю.

Надырны иниси Нюрбек 1994-нчю йылны февраль айыны 14-нде тувгъан, Юрт школаны охуп битдиргенден сонг Москва областда ич асгер бёлюклерде къуллукъ этип къайтгъан ва контракт язып, Буйнакскидеги 136-нчы асгер бригадагъа тюшген.

2022-нчи йылны март айында Нюрбек къуллукъ этеген асгер бёлюкню Донецк областны Докучаев шагьарына бакъдыралар. Шо йылны май айыны 13-нде украинли миллетчилерини янындан болуп гетген гючлю топ атышывланы натижасында, яннавурунда яра тийип йыгъылгъан ёлдашын къутгъарма чапгъан Нюрбек де яралана. Буса да ол эсин жыйып, санчастгъа хабар эте, яралангъан ёлдашын къутгъарма къасткъыла. Булагъа къолай болгъунча госпиталларда ятма да тюше. Ярасы къолайгъа къайтгъанда Нюрбек гене де оьзю къуллукъ этген асгер бёлюкге, ёлдашларыны янына къайта.

Н. Амурханов асгер къуллугъун оьр даражада кютегени учун Россияны Президенти В.В.Путинни Указы булан 2022-нчи йылны 27-нчи июнунда Жуковну медалы булан савгъатлана. Агьлюсю Марьям, ата-аналары, юртлулары бу уланлар ватаныны алдындагъы асгер ва ватандашлыкъ борчларын намусу булан кютюп юрюйгенине, олагъа гьар къачан да аркъа таяма болагъанына герти кюйде оьктем болалар.