Гьайванчылыкъ – бизин республикабызны аграр комплексинде мердешли тармакъ. Оьтген сынав аянлашдырагъаны йимик, къоллавчулар учун лап да тарыкълы сурсат маллар болдурулагъан тармакъны оьсювю гьайван-малгъа этилинеген къуллукъланы, гьазирленеген гьар тюрлю емлени сан яны ва оьлчевлери булан тувра байлавлу.
Бугюнлерде де республикабызны ем гьазирлевчюлери, бар имканлыкъланы къолдан чыгъармайлы, жаваплы борчларына намуслу кюйде янаша демеге ярай. Гьалиге ерли гьайван-мал оьсдюрюв булан машгъул болагъан районланы юрт хозяйство предприятиелеринде, сабанчы-фермер агьлюлерде ва кооперативлерде 1 миллион 200 минг тон къатты емлер гьазирленген. Шону авадан пайы, дагъы да ачыкъ этип айтсакъ, 1 миллион 100 минг тону тайлагъа къысылып, бичен аракълагъа салынгъан. Шону булан янаша 106 минг тон салам да тайлагъа къысылып, аракъларда сют-гьайванчылыкъ фермалагъа, къышлав къотанлагъа ювукъда ерлешдирилген, 11,2 минг тон сенаж, 1153 тон силос къуюлагъа тёшелген.
Хасавюрт, Бабаюрт, Къызлар, Тарумов, Ногъай районланы ем гьазирлевчюлерини умуми гьаракатыны натижасында емлени 55 проценти гьазирленгени гьакъда айрыча эсгермеге тюше. Къаягент, Къарабудагъгент ва Къазбек районланы ем гьазирлевчюлери де борчларына бажарывлу кюйде янаша.
ДР-ни юрт хозяйство ва сурсат министерлигини прес-къуллугъу бизге билдирген кюйде, айлана якъдагъы оьсюп тербейген талапланы гьисапгъа алып, гьайван-малланы токъ къышлавун болдурмакъ учун бу йыл да республикабызда 1 миллион 500 минг тондан кёп къадардагъы емлени гьазирлемеге умут этилине.
– Не чачсанг, шону аларсан деген сынавгъа арт бермеге тюшмей, – дей ДР-ни юрт хозяйство ва сурсат министри Мухтарбий Ажеков. – Ем оьсюмлюклер учун пайдаландырылагъан чачыв авлакълар асувлу кюйде къоллана. Биченликлерде сугъарыв ишлер ёрукълашдырылагъаныны натижасында йылда кёп йыллыкъ ем оьсюмлюклени эки-уьч керен чалмагъа имканлыкълар яратылына.
Къарамагьаммат Къараев.
