Барыгъыз да билеген кюйде, гьар йыл ноябр айны ахырынчы къаттыгюнюнде бизге дюньяны ярыгъын гёрсетген Аналаны гюню белгилене. Бу йыл да, ноябр ай башлангъанлы, гьар ерлерде, охув ожакъларда шо байрамгъа багъышланып гьар тюрлю чаралар оьтгерип туралар.
Алдагъы гюнлерде Къарабудагъгент районну администрациясында да мукъаятлы кюйде гьазирленген Аналаны гюнюне багъышлангъан гёрмекли мажлис болду. Шонда районну гьар юртундан гелген кёп яшлы аналар, сыйлы къонакълар ортакъчылыкъ этдилер.
Жыйылгъанлагъа ярыкъ, исив береген, арив безендирилген сагьнагъа белгили йырав Патимат Гьюсейнова чыгъып, аналагъа багъышлап къурч тавушу булан йырлап, халкъны жанландырды.
Ону арты булан адатлы кюйде аналаны, гелген къонакъланы къутламагъа Къарабудагъгент районну ёлбашчысыны биринчи заместители Агьмат Абдулмежитович Гьажиевге сёз берилди. Ол оьзюню къутлав сёзюнде, яшавубузну башы сыйлы болгъан аналар экенни айтды. Неге тюгюл, ожакъгъа исив береген де, ону берекетин артдырагъан да, агьлюге, авлетлеге гьайлы янашагъан да асил аналар экенни эсгерди.
Район администрацияны социал масъалалагъа къарайгъан управлениесини касбучусу, концерт программаны башындан ахырына ерли юрютген Найида Мурзаева Къакъашураны 1 номерли школасыны яшларын чыгъып чер болуп бийиме чакъырды.
Бу сыйлы байрамны лап да агьамиятлы, гёзел ери кёп яшлы аналаны акъча ва оьзге къыйматлы савгъатлар булан Къарабудагъгент районну ёлбашчысы Магьмут Амиралиев савгъатлагъаны болду.
Ол оьзюню сёзюнде де булай айтып къутлады:
–Бизин яшавубуз аналар булан башланагъан йимик, аналар булан да узатыла. Ана да, бала да – шатлыкъда да, къайгъыда да бир-бирине тыгъыс байлангъан инсанлар. Аналар бизин юрюмеге де, яшамагъа да уьйрете, оьз оьмюрюбюзге де насигьатлар берип геле. Бизин райондагъы адамурлукъну инг де гьайран арив яны деп гьисапланагъан къатынлар, аналар гьар тармакъда уллу къошум эте. Олар къан-тер булан чалыша туруп, айлана янында парахатлыкъны, татывлукъну, эсен-аманлыкъны болдура.
Гьюрметли аналар, къатынлар, мен сизин барыгъызны да гьакъ юрекден къутлайман, гьар заман сизин яшавугъузда сююнчлер, яхшылыкълар кёп болсун, бары да эргишилени атындан сизге баракалламны билдиремен! – деп тамамлады оьзюню сёзюн М. Амиралиев.
Бу ерде айрыча Дагъыстанны Халкъ Жыйыныны депутаты Магьамматсолтан Магьамматовну атын уллу гьюрмет булан эсгермекни тийишли гёремен. Неге тюгюл, ол гьар йыл байрамда аналагъа савгъатлар этмей, харж булан якъламай бир де къоймагъан. Бу гезикде де бу гёрмекли мажлисге ону аслам къошуму болду. Шо ахшамда ону атына кёп баракалла сёзлер айтылды.
Шо шатлы жыйында А. Къаплановну атындагъы эргишилени хору, англы тавушлу Альбина Къазакъмурзаева, халкъны сююмлю йыраву болуп битген, къонгуравлу сеси булангъы Дагъыстанны ат къазангъан артисткасы Саният Надирбекова ва оьзгелери байрамгъа айрыча ярыкъ ва ренк бердилер.
Озокъда, сагьналаны бийкеси, бюлбюлюбюз Бурлият Ибрагьимованы гьаманда йимик, узакъ харс урувлар булан къаршыладылар. Ону йыры халкъны сююнчюне сююнч къошду.
Къонакъланы арасында Дагъыстанда «Россияны аналары» деген гьаракатны ёлбашчысы Таиса Магьамматованы сёйлевю де бек таъсирли эди. Шо гюн «Тангчолпан» журналны редактору, шаир Супиянат Мамаева да бары да аналаны къутлап, олагъа багъышлангъан шиърусун охуду.
Жыйынны ахырында Къарабудагъгент районну социал масъалалагъа къарайгъан управлениени начальниги, районну къатынгишилерини советини председатели Гюлжанат Темирова кёп арив сёзлер айтып къутлагъандан къайры, бары да къонакълагъа, ортакъчылыкъ этгенлеге гьакъ юрекден баракалласын билдирди.
