Россияны энергетика министрини заместители Евгений Грабчак федерал къурумну артдагъы генгешинде Дагъыстанны гьакимиятындан республикада законсуз къурулгъан 597 кёп къабатлы яшавлукъ уьйлени бузувгъа байлавлу ишни жанландырма талап этген. Уьстевюне, бузувлар башлангъанча, шо уьйлени ичинде турагъанлар баргъа да къарамай, ярыкъларсыз къоймакъны тийишли гёре.
Огъар жавап гьисапда Республиканы Башчысы Сергей Меликов Telegram- каналында: «Евгений Петрович оьзю де Дагъыстанда болгъан ва пачалыкъ къуллукъчу гьисапда шо ёл булан барсакъ масъала бирдокъда чечилмежегин, дагъыдан да бек оьрчюжегин, озокъда, англамай тюгюлдюр. Лакъыр адамланы гьакъында юрюле. Инг алдын оланы гьалын, кююн ойлашмагъа герекбиз»,– деп язгъан.
Бир ай алъякъда Магьачкъалада приставлар судну къарарына гёре, хас техниканы да къуршап, шагьарны Тбилисская орамында ерлешген 9 къабатлы уьйлени бузгъан эди. Бир мюгьлетни ичинде нече-нече агьлюлер орамда къалдылар. Бирлери барып дос-къардашларында сыйынды, башгъаларына заманлыкъгъа буса да янгы квартирлер излемеге тюшдю. Бу агьвалат, Интернетдеги сесленивлеге къарагъанда, жамиятны арасында уллу разисизликлени тувдурду. Уьй-эшиксиз къалгъанланы арасында Украинадагъы хас асгер гьаракатда ортакъчылыкъ этеген Рауфат Адашириновну агьлюсю де болгъан деген хабар яйылгъанда, танкъытлы сесленивлер дагъыдан да бек гючленди. «Мен мунда бизин Ватанны ихтиярларын якълайгъан вакътиде, оьзюмню уьюме гелип балагь къопгъан»,– деп эсгере Рауфат ерли гьакимиятны атына этген видеочакъырывунда.
Уллу федерал къуллукъчу салагъан талаплагъа къайтгъанда, ол лакъырны бир уьйню айланасында юрютмей чи, оьзлерде, азында, 30 минг сама агьлю яшайгъан 600-ге ювукъ уьйлени гьакъында айтыла. Шо ерли халкъны къаршылыкъ билдирив чаралагъа чыкъмагъа талпындырмасмы? Гертиси, шо уьйлени бирлери яшамакъ учун пайдаландырывгъа берилмеген.
Тувулунгъан гьалгъа къарагъанда, озокъда, юз тюрлю адилли соравлар тувулуна. Республиканы тахшагьарында йыллар булан законсуз кюйде залим-залим биналар къурулагъанда , жаваплылар къайда къарай болгъан экен? Неге о заман талаплар салынмай эди? Уьйлер сигьрулу ёммакъда йимик бир гюнню ичинде тургъузулуп къалмай чы. Мен билеген кюйде, бизде янгыз федерал тергевчю къурумланы санаву 20-гъа етише. Олар оьзлени тувра борчларын кюте болгъан буса, биз бугюнгю гьалыбызгъа етишерми эдик? Законсуз уьйлени къургъан къурумланы ёлбашчыларыны къайсыларын жавапгъа тартгъан деп эшитгенсиз яда охугъансыз?
Эгер де биз шу четим масъала, гертиден де, адилли кюйде уллу жамият разиликлерсиз чечилгенни сюе бусакъ, бузув-тозувланы башлагъанча инг алдын оьрде эсгерилген соравлагъа жавапланмагъа тюшедир.
