Бугюн Хасавюртдагъы электрик хозяйствода 93 адам ишлей. Гьисапгъа алынгъан абонентлени санаву 32 мингден оьтген. Шагьар яхшы оьсген ва электрик гючню къоллайгъанланы санаву да гюн сайын арта. «ДАГЭНЕРГО» компанияны Хасавюрт шагьардагъы бёлюгюню начальнигини заместители Адил Магьамматов айтагъан кюйде, электроэнергияны къоллавчулагъа къуллукъну етишдирмек – оланы аслу борчу.
Бир тюрлю къыйынлыкълар да болмай къалмай. Шагьарны ичиндеги эсги болгъан трансформаторланы ва теллени янгыртма герек. О ишлени харж болмаса оьтгерип болмайгъанын да эсгерме тюше.
Яйны айларында шагьарны ичинде яшайгъанланы уьйлеринде, тюкенлерде, офислерде, идараларда кёп кондиционерлер ишлей. Шогъар кёп ток харжлана ва трансформаторлагъа да гюч болагъаны белгили.
Нечакъы къыйын болса да, шагьарда электрик хозяйствону бары да къуллукъчулары гьазир туралар ва тарыкъ ерге етишип, тийишли ишлени оьтгерелер.
Измулла ГЬАЖИЕВ.
Автор чыгъаргъан сурат.
