– Россияны Президенти В. Путин Адабиятны йылы гьакъындагъы къараргъа къол сала туруп: «Шу проект жамиятны бирлешдиреген йыл болур, – деди, чараны ача туруп, маданиятны район управлениесини начальниги М. Магьамматалиев. – Гертиден де, бу йыл бизин бирикдиреген, арагъа янгы пагьмулар чыгъарагъан ва тиллени унутма къоймайгъан, язывчулагъа, шаирлеге илгьам гелеген йыл болур деп умут этебиз».

Чарада райондагъы тюрлю-тюрлю миллетлени язывчулары ортакъчылыкъ этди. Яхсайдан ерли шаирлер Камалдин  Мусаев, Адил Бийтемиров,  Ботаюртдан Женнет Мусаева, Къурушдан Акиф Лазимов, Моксобдан Магьаммат Омаров, Эндирейден Гебек Къонакъбиев жыйылгъанланы алдында шиъруларын охуду ва гёз алгъа тутулгъан умутларыны гьакъында айтды.

Оланы кёбюсюню шиъруларына гёре йырлар язылгъан. Районну чебер иш гёреген коллективлери йырлар йырлады, охувчу яшлар оланы асарларындан гесеклер охуду.

Адабиятны йылыны ачылыву булан жыйылгъанланы Айдемир Хангереев, Анвар Байсонгуров ва башгъалары да къутладылар.

Шаирлени, язывчуланы ва охувчуланы ёлугъувлары башгъа юртларда да оьтгерилежек.

 

Г. БЕК.