Алдындагъы гюн «Ёлдаш» газетни редакциясына газетни гьамангъы гьалал ёлдашы, халкъ арада таза, эдепли, жигерли ва гьар-бир затда яхшы англаву бар улан гьисапда белгили чонтавуллу Устархан Алюков къуллугъу болуп гелди. Ол оьз заманында гьар тюрлю жаваплы ва абурлу къуллукъланы башын тутуп ишлеген ва аты яхшыгъа айтылгъан адам. Сорашывлардан сонг болгъан лакъырыбызны барышында ол оьзюню башындан оьтген ишгъынсыз ишлени аз-азларын суратлады.
– Биле бусан, инишим, яшавда, иш уьстюнде не де болуп къала. Бары зат теп-тегиш болмайгъаны да белгили. Мен торай чагъымдан берли адам деген атыма къара юкъдурмай яшамагъа къасткъылгъанман. Гьатта денгиз флотда асгер борчумну кютегенде де къуру разилик ала эдим. Ондан сонг ишлеген бары да ерлеримде де, комсомол, партия къуллукъларында да гьеч бир айып алмай чалышып гелгенмен. Кимге де оьзюмден болагъан яхшылыкъны этмеге къарагъанман. Сен де эшитмей тюгюлсендир, 2018-нчи йыл январда магъа негьакъ япалгъан айыпны, – деп, ол пашман болуп ойлагъа батды.
Ол магъа англатгъан кюйде, оьзю «Къызылюрт шагьар» деген муниципал къурумну администрациясыны башчысы болуп ишлейгенде, сайки, федерал еслигиндеги топуракълардан, демек, «Гудок» деген бавчулукъ товариществода эки участканы ерли адамлагъа законсуз кюйде берген деп айып салгъан болгъан…
– Айтаман чы, мен шу оьмюрюме гелип гьарам этген заманымны билмеймен. Ахтарыв къурумланы бир тайпа къуллукъчулары, мени ачыкъ кюйде айтагъан гертиме къулакъасмай, бир йылдан кёп мени тазза инжитди. Шогъар къыйналып аврувлу да болдум, достум. Мен башдан гечирген къыйын гьалланы кёп айта да турмайым. Шолар мени яраларымны хозгъай. Тек мен таза экенимни биле эдим, герти ялгъанны утар бугъай деп умут да уьзмей эдим. Шюкюр Аллагьгъа, шо гюнню гёрюп ял болдум. Мен сизге мени айыбым ёкъ деп суд гесген тёрени алып гелгенмен. Сиз шону газетге язып чыгъаргъанны, мен биревлер йимик «талавурчу» тюгюл экенимни, гьарам этмегенимни халкъ билгенни сюемен. Шо да мени ярама бир ямав болур эди деп ойлашаман, – деди Устархан агъай.
Артда магъа ол судну тёресин охумагъа берди. Шонда не гьакъда айтылагъанын газетге язып, гертиден де, «Агъай» деген атгъа гьалал болуп асил яшагъан Устарханны ачытгъан жанын бираз сама да ял этмеге токъташдым.
Баягъы эсгерилген топуракъ пайланы берип, У.Алюков администрацияны башчысы болгъан вакътисинде гетген йылны январында РФ-ни УК-сыны 286-нчы статьясыны 2-нчи бёлюгюнде айтылагъан кюйде, жинаят иш этген деп язылгъан шонда. Сонг, демек, 2018-нчи йыл 22-нчи апрелде УК-ны 293-нчю статьясыны 1-нчи бёлюгюне гёре айыплав иш ачгъан. Ахтарыв къурум (башчысы Г.Н.Магьамматов) ол уьлешип берген эки де участка Темиркъазыкъ Кавказ темир ёлланы Магьачкъала бёлюгюню еслигине гиреген ерлер болгъан, шо буса федерал есликдеги топуракълар, шоллукъда Россияны бюджетине 200 миллион манатны къадарында зарал болгъан деп тута.
Артда Хумторкъалидеги район судну къарарына асасланып, «Суд экспертизаны республика центры» деген дазулангъан жаваплылыгъы булангъы жамият эсгерилген шо ерлени дазуларын оьлчеп, тындырыкълы кюйде тергевлер этип къарагъан сонг, эки де ерли адамгъа берилген топуракъ участкалар темир ёлланы Магьачкъала бёлюгюню еслигинде тюгюл экенни ва бир заманда да болмагъанны ачыкъ этген.
Хумторкъали район суду (судья А.Алишаев) бу айыплав ишни материалларын бары да якълардан етдирикли тергеп, Устарханны якълавчусу адвокат С.Къадырова гёрсетген материалланы гёзден гечирип къарап, 2019-нчу йылны 3-нчю июнунда, Устархан Алюков этген ишде такъсыргъа тутмагъа ярайгъан гьеч бир себеп ёкъ деп гьукму чыгъаргъан. Иш Дагъыстан Республиканы Оьр судуна къарамагъа берилгенде, о да Хумторкъали район судну тёреси терс тюгюл, тюз деп тасдыкъ этген.
Шолайлыкъ булан алда Къызылюрт шагьарны администрациясыны башчысы болгъан Устархан Алюков айыпдан толу кюйде чайылгъан.
Иш булай битгени, озокъда, яхшы. Тек англавлу, намуслу, асил къылыкълы адамлагъа алгъасап ябылгъан яла оланы къысматына, жанына яман яра сала. Бузулгъан гёнгюлню, савлукъну нелер этсенг де къайтарып болмайсан чы. Кекелли, дейгеним, тазза эркеклени заман ва алышынып тербейген гьаллар кёп чайкъап, сынап къарайгъаны белгили. Шоланы авурсынмай гётермеге буса янгыз яшав гёрген, сыналгъан кеслер бола. Устархан агъай да – шолайланы бириси ва тириси. Булай уланлагъа яманлыкълар бир де къаршы болмай буса яхшы эди.
СУРАТДА: У. АЛЮКОВ.
