Белгили болгъан кююнде, 1993-нчю йылда халкъны тавуш беривю булан Россия Федерацияны янгы Конституциясы къабул этилинген.
Россияны о замангъы Президенти Борис Ельцинни Указы булан 1994-нчю йылда 12-нчи декабр пачалыкъ байрам гьисапда белгиленгени де аян.
«Россия Федерация – Россия толу ихтиярлы демократ федератив пачалыкъ», – деп башлана янгы Конституцияны биринчи статьясы. Демек, гьакимиятны баш къуралы Россияда кёп миллетли халкъ болуп токътай. Шо саялы да оьр гьакимият къурумлары демократ жамиятда бютюн халкъны тавуш беривю яда буса референдум оьтгеривню натижалары булан токъташдырыла.
Россияны Конституциясына пачалыкъны аманлыгъын якълайгъан закон деп де негьакъ айтылмай. Арадан оьтген 25 йылны ичинде айлана якъда болуп турагъан алмашынывланы, заманны талапларын гьисапгъа алып, шону бир нече статьяларына толумлашдырывлар, алмашынывлар этилингени де англашыла.
Мердешленген кююнде, шо гюн Россияны бары да регионларыны шагьарларында, юртларында, ерли гьакимият ва пачалыкъ къурумларында ватандашланы къабул этивлер къурумлу кюйде оьтгериле демеге ярай.
Айтмагъа сюегенибиз, арадан оьтген вакътини ичинде Россияны Конституциясы оьзюню пайдаларын якълай туруп пачалыкъны ва халкъны аманлыгъына къуллукъ эте. Социал-экономика масъалаланы ёрукълашдырывда уьлкени инамлы якълавчусу болуп токътай.
Конституция ихтиярланы якълавда Дагъыстанны Халкъ Жыйыныны депутатлары ва шолай да ерлердеги район, шагьар жыйынланы вакиллери де гьакимият къурумлар булан байлавлукъда борчларына намуслу кюйде янашса, айтагъаныкъ, сайлавчуланы тапшурувларындан баш къачырмаса, пачалыгъыбызны, халкъны гележекдеги оьсювюне де инамлыкъ азмажагъы гьакъ.
Ватандашланы къабул этив булан дазуланмайлы, шо гюн Россияны оьзге регионларында йимик, Дагъыстанны шагьарларында, районларында да байрам шатлыкълар ахшам геч болгъунча узатыла.
Шолайлыкъда, милли бийивлери, йырлары булан инчесаниятыбызны, маданиятыбызны усталары къаравчуланы исси кюйдеги харс урувларын, разилигин къазана.
Уьлкебизни Конституция къабул этилген гюнню къаршылай туруп, бугюн бизге де, бары да дагъыстанлылагъа йимик, зор пачалыгъыбызгъа да яхшылыкъ булан аманлыкъ ёрамакъ къала. Неге тюгюл, бизин гючюбюз-къудуратыбыз – Россия Федерацияны бары да халкъларыны бирлигинде.
