Янгыз яшлар тюгюл, уллулар да Янгы йыл байрамны алдындагъы гюнлерде сигьрулу аламатлагъа инана. Шолай, «ПРОМЕТЕЙ» деген гьар тюрлю гьаракатлагъа гёнгюллю къошулагъанланы республика бирлешивюне къуршалгъан Къарабудагъгентдеги бир номерли орта школаны охувчулары яшавлукъ этмек учун харжы етишмейген, кёп яшлы, олай да сакъат яшлары булангъы агьлюлеге къонакълай барды. Яшланы янгы йылны алдында яшавда яхшылыкълар болагъанына инандырмагъа, гёнгюн алмагъа къаст этгенден къайры да, эсгерилген агьлюлеге рагьмулукъ кёмек де болдурду.
Ачыкълашдырып айтгъанда, «Янгы йыл байрамны сигьрулу аламатлары» деген республика чараны оьлчевюнде охувчу яшлар оьзлени ата-анасыны ва гьар тюрлю ишлеге гёнгюллю къошулагъанланы ерли бирлешивюню ёлбашчысы Загьра Багьавутдинованы кёмеги булан жыйылгъан опуракъланы ва оьзге савгъатланы оьрде эсгерилген агьлюлердеги яшлагъа тапшурду. Сувукъмурзаны ва Къаркъызны келпетинде оьзлени уьйлерине гелген гьар тюрлю ишлеге гёнгюллю къошулагъанланы ерли бирлешивюне къуршалгъан Сугьат Къазакъбиеваны ва Гюлмира Абакарованы гёрюп, яшлар айрыча сююндю. Оьз гезигинде янгы йылны алдында олар булан уьюне гелген къонакълагъа байрамгъа багъышлангъан шиъруларын охуду. Эсделикге суратлар чыгъарылды.
