Февраль айны 28-нде, Магьачкъалада Дагъыстан Республиканы Халкъ Жыйыныны гезикли 31-нчи сессиясы оьтгерилген. Ону ишинде Дагъыстан Республиканы Башчысы Владимир Васильев де ортакъчылыкъ этген.
Сессияда аслу гьалда Дагъыстан Республиканы Гьукуматыны 2018-нчи йылдагъы гьаракатыны гьасиллери чыгъарылгъан. Шогъар байлавлу ДР-ни Гьукуматыны Председатели Артём Здунов доклад этген.
Чыгъарылгъан гьасиллеге гёре 2018-нчи йылда республика бюджетге жыйылгъан харжны къадарын 5 миллиард манатгъа етишдирме бажарылгъан. Шоллукъда, Дагъыстан Республиканы харж якъдан борчлары 2,4 миллиард манатгъа аз болгъан. Инг аслусу – федерал къурумланы инанывун къазанма болгъанлыкъ ва гелеген харж маяланы 8 процентге (6 миллиард манатгъа) артдырма имканлыкъ тувулунгъаны.
Ондан къайры да, республиканы инвестиция программасын 5 керенге артдырма бажарылгъан. Бюджет топлавлар 1,7 процентге къолайлашгъан.
«Шо харж – биз оьзюбюз къазангъан маялар. Ону оьзюбюз тийишли гёрген кюйде харжлама болабыз. Тезликде харжлап битдирип къоймакъ да борч тюгюл. Алгъасамай, кёп адамгъа пайдасы тиеген кюйде харжлама тарыкъ», – деп билдирген Дагъыстан Республиканы Гьукуматыны Председатели Артём Здунов.
Оьзюню сёйлевюнде ДР-ни Гьукуматыны башчысы оьтген йылны ва бу йылны масъалалары гьакъында да айтгъан. Оланы арасында промышленностну оьсювю, шагьарланы ва районланы гёрюнюшю, теплица хозяйстволар къурмакъ, ишлетеген производстволар къурмакъ, республиканы толу кюйде мелиорация булан таъмин этмек деген масъалалар бар. Гьукуматны ёлбашчысы балыкъ ишлетивню янгыртмакъны республиканы оьсдюрювню бирдагъы бир имканлыгъы гьисапда къабул эте. Стратегия масъалаланы гьисабында билим беривню ва юртларда медицинаны яхшылашдырывну масъалаларын эсгере.
Артём Здунов Дагъыстан учун айры федерал оьлчевде документ болма герек деген масъаланы да гётере.
ДР-ни Халкъ Жыйыныны Председатели Хизри Шихсайитов айтгъан кюйде, республиканы Гьукуматы кёп тюрлю пайдалы ишлени яшавгъа чыгъаргъан. Ону ишине яхшы къыймат да берилген.
Бизин маълумат.
