Интернетни къоллавгъа тергев арта
Талатгюн, февраль айны 12-синде, «Россия – мени тарихим» деген тарихи паркында «Интернет торунда торайып гелеген наслуну маълумат аманлыгъы» деген агьамиятлы масъалагъа байлавлу «дёгерек столну» айланасында пикру алышдырыв юрюлдю.
ДР-ни яшёрюмлерини ишлерине къарайгъан министерлигини ва «Ростелеком» деген акционер жамиятыны бизин республикада иш гёреген бёлюгюню сиптечилиги булан оьтгерилген шо пикру алышдырывну барышында оьр класланы охувчуларындан къайры да, школаланы ва коллежлени муаллимлери, «Интернетни ахтар – шонда долан» деген интернет оюнну ортакъчылары жагьчылыкъ гёрсетди.
«Ростелеком» деген акционер жамиятыны жаваплы къуллукъчусу Лайла Солтанова, «Россия – мени тарихим» деген тарихи паркыны ёлбашчысыны заместители Исмайыл Ханмурзаев, олай да Россияны ФСБ-сини Дагъыстангъа къарайгъан гюмрюк управлениесини ёлбашчысы Владислав Соловьёв ва кёп оьзгелери жыйылгъанлагъа арагъа салынып ойлашылагъан масъаланы гьакъында айтды. Шону булан бирге олар оьтген йылны ноябр айында Бютюнроссия оьлчевде юрюлген «Интернетни ахтар – шонда долан» деген интернет оюнда дёртюнчю ерни алмагъа бажаргъан пагьмулу яшланы республика лицейини охувчуларын къутлады.
«Интернетде аманлыкъны жумалыгъыны» оьлчевюнде юрюлген пикру алышдырыв тамамлангъан сонг, шону ортакъчыларына барысы да «Россия – мени тарихим» деген тарихи паркыны экспонатлары булан таныш болмагъа имканлыкъ берилди.