Буйнакск районну Буглен юртунда республикада белгили пачалыкъ чалышывчу Шихсайит Шихсайитовну 90 йыллыгъы белгиленди. Буглен юрт гиччи буса да – талигьи уллу юртлардан бириси. Бу юртдан чыкъгъан белгили адамланы арасында Шихсайитовланы тухуму айрыча ер тута. Булай пачалыкъ къуллукъларда ишлеген адамларыны кёплюгю булан Дагъыстанда болма имканлы дагъы тухум ёкъдур.

 

Шихсайитовланы тухуму янгыз Буглен юртда тюгюл, Дагъыстанда да оьр даражада белгили. Тухумбашы Иса Шихсайитов Буйнакск районну Райисполкомуну председатели болуп кёп йыллар ишлеген. Сонг ону уланы Шихсайит Шихсайитов геле. О йылларда, партияны инг де тергевю кёп вакътилерде, пачалыкъ къуллукъларда гётерилмеге оьтесиз англавлу, билимли ва мекенли тазалыгъы булангъы адам болмаса бажарылмай болгъан. Шихсайит Исаевич КПСС-ни Дагъыстан обкомуну экинчи секретарына ерли етишген. Ол ёлбашчылыкъ этеген юрт хозяйство тармакъны оьсювюн болдурмакъ учун гьаракаты булан гьасиллер де гёрсетме бажаргъан. Оланы бирерлетип эсгере турмагъа бу макъаланы оьлчевюнде бажарылмай. О гьакъда айтылгъан, бизин газетни бетлеринде де кёп язылгъан, китаплар чыгъарылгъан.

Бугленни тарихи музейини сагьнасы булан залында оьтгерилген эсделик чараларда ортакъчылыкъ этмек учун Шихсайит Шихсайитовну ювукъ къардашлары, район администрацияны жаваплы къуллукъчулары, оьзге юртлардан, Магьачкъаладан гелген къонакълар да бар эди.

Къонакъланы бириси, Буйнакск районну биринчи секретары болуп ишлеп тургъан Шарапутдин Инигов оьзю бек яхшы таныгъан ва ювукъ аралыкълар тутгъан Шихсайит Шихсайитовну гьакъындан айтгъынча, Буглен юртну, Буйнакск районну жамиятына Дагъыстанны темиркъазыкъ боюндан (Къызлар бойдан) къайнар салам да алып гелгенин эсгерди.

Ёлдаш газетни атындан баш редакторну заместители Магьаммат Гьадисов да Буглен юрт­ну музейине савгъат гьисапда Хизри Шихсайитовну суратын, атасы чыгъаргъан Шихсайитовланы оьзге суратларын ва Буйнакск районну 70 йыллыгъына багъышланып чыгъарылгъан журналланы экисин савгъат этди.

Залгъа жыйылгъанлар Да­гъыстанны халкъ шаири, эрпелили Агьмат Жачаевни къужурлу сёйлевюне де агьамият берип тынглады. Ол Шихсайит Шихсайитовгъа багъышлап язгъан поэмасындан гесеклер де охуду.

Бугленде яшайгъан тамаза Мугьютдюн Салаватов да ­оьзлер гиччи заманда Шихса­йит булан ювукъ аралыкълар, къурдашлыкъ юрютгенин айтды ва ону атына йылы сёзлер багъышлады.

Шихсайит Исаевични уланлары Музакир ва Мурат Шихсайитовлар да атасыны насигьатлары оьзлеге билим ва тарбия алмакъ учун нечик пайдалы болгъан экенин эсгердилер.

Эсделик чарагъа байлавлу сёйлегенлени къайсы да ­Шихсайитовланы тухумуну тарихи терегини аслу бутакъларыны бириси болуп токътагъан Дагъыстан Республиканы Халкъ Жыйыныны Председатели Хизри Шихсайитовну ва ДР-де пачалыкъ къуллугъуну ва Россияны маданиятыны да ат къазангъан къуллукъчусу, белгили жамият чалышывчусу Разия Жанболатованы ата юртуну талигьи бай болсун учун, юртну абуру артсын учун этеген гьаракатыны гьакъында да кёп эсгердилер.

Хизри Исаевич нечесе йылланы узагъында республиканы оьр гьакимият къурумларында жаваплы къуллукълар кюте туруп белгили болгъанын билмейген адам ёкъдур. Разия Исаевна да Буглен юрт учун кёп къуллукъ этген. Юрт музейине баргъан адамгъа ону англама тынч. Ону гьаракаты булан къурулгъан музей уью – респуб­ликадагъы булай музейлени арасында инг де гёрмеклиси. Музейлер юртланы тарихи байлыкълары бола. Шо янындан Буглен юртгъа бирдагъы насип болгъан деп де айтмагъа ярай.

Байрамча безендирилген бу эсделик чарада белгили эстрада йырав, жюнгютейли Руслан Загьиров да ортакъчылыкъ этди. Ону йырларын не заманда да халкъ арив къаршылай.

Шо гюн Бугленде оьтгерилген сурат выставка да гелгенлени тергевюн тарта эди. Художник Бадавутдин Суваков оьзю этген суратларда белгили адамланы портретлерин ва пейзаж асарларын гёрсетди.

 

Максим Эсембиев.

 Суратда: Буглен юртда оьтгерилген эсделик чарадан гёрюнюш.