Дёргелидеги юрт китапхана ва ону ёлбашчысы Айшат Изиева оьтгереген байрамлар ва оьзге тюрлю чаралар гьар заман адамланы эсинде къалардай бола. Муна 23-нчю апрелде де Дёргелиде «Ёлдаш» газетни бёлюгюню редактору, шаир Насрулла Байболатовну ва «Районну яшаву» деген газетни баш редакторуну заместители, шаир Багьавутдин Саматовну яратывчулугъуна багъышлангъан чара оьтгерилди.
Дёргели юрт китапхананы ёлбашчысы Айшат Изиева Дёргели 1 номерли орта мактапны фойесине охувчулар ва муаллимлер жыйылгъан сонг, бизин ана тилибизни гьакъында гьар тюрлю маълуматлар берип сёйледи. Сонг ол оьзюню сёйлевюнде бизин райондан чыкъгъан шаирлени ва журналистлени Насрулла Байболатовну ва Багьавутдин Саматовну загьмат ёлу ва яратывчулугъу гьакъда баянлыкълар берди.
Ону сёйлевюнден сонг Дёргелидеги 2 номерли орта мактапны завучу Магьамматбашир Атагишиев Б.Саматовну гьакъында бир-эки сёз айтды. Ону сёзлерине гёре, ол Б.Саматовну таныйгъанлы 5-6 йыллар бола. Шо заманны ичинде олар кёп тюрлю чараларда ортакъчылыкъ этгенин ва герти къурдашлар болгъанын англатды.
Шатлы ёлугъувну барышында Дёргелидеги 1 ва 2 номерли орта мактапланы охувчулары Н. Байболатовну ва Б. Саматовну шиъруларын гёнгюнден охудулар. Яшланы шиъруланы чебер кюйде охугъанына къаравчулар рази къалды.
Олай да, чараны барышында Дагъыстанны ат къазангъан муаллимлери А.Байсонгурова ва Р.Жанмурзаева шаирлени яратывчулугъуна багьа берип, оьзлени пикруларын айтдылар. Олар эсгерген кюйде, Н.Байболатов ва Б.Саматов оьзлени асарларында халкъны ана тилин, оьз элин сюймеге ва гьар даим гьюрмет этмеге чакъыра туруп, адамланы ва айрокъда оьсюп гелеген наслуну уллулагъа абурлу ва эдепли болмагъа чакъыра.
Оьтгерилген чарада йырав Сабина Алиева ва макъам согъагъан Арсен Акаев оьзлени йырлары булан шатлыкъны дагъыдан-дагъы безендирди, къаравчуланы юреклерин хошлу этди деп айтмагъа ярай. Ёлугъувну ахырында ону юрютеген А.Изиева журналист, шаир ва «Районну яшаву» деген газетни баш редакторуну заместители Багьавутдин Саматовгъа сёз берди.
Ол оьзюню сёйлевюнде оьтгерилген чараны онгаргъан Айшат Изиевагъа, 1 ва 2 номерли орта мактапланы муаллимлерине ва охувчуларына булай ёлугъув оьтгергени учун баракалласын билдирди.
Нюрсагьадат ИЗАМУТДИНОВА.
