Уллу Ватан давда Къаягент райондан 2634 адам ортакъчылыкъ этген. Оланы 443-вю – Башлы якъдан. Къайырбек Мамасиевич КЪАЙЫРБЕКОВ да – оланы бириси.

Ол Къызыл Армияны сыдыраларына 1940-нчы йылны июн айында чакъырылгъан. 1941-нчи йылны июн айыны 22-синден тутуп, Уллу Ватан давда болгъан. 1945-нчи йылны март айыны 31-нде ол авур яралангъан, госпиталлардан сонг ата юрту Гьапкъайгентге къайтгъан. Давдан сонггъу йылларда Янгыкъаягентде яшагъан, гьар тюрлю пачалыкъ къурумларында ишлеген.

Журналист касбуну юрютегенли, гьар тюрлю къысматы булангъы адамлар булан, айрокъда Уллу Ватан давну ортакъчылары булан кёп керенлер ёлукъгъанман, лакъыр этгенмен. Тек Къайырбек Мамасиевич булан 1978-1984-нчю йылларда нече гезик къаршылашсакъ да, сабур олтуруп мекенли лакъыр этмеге тюшмеди. Мен ойлайгъан кюйде, ол парахат, сюйкюмлю, оьзюн сюйдюрмеге, кёмек къолун узатмагъа болагъан ва тутгъан касбусун яхшы билеген адам эди.
Артдагъы йылларда Россияны Оборона министерлиги Уллу Ватан давну ортакъчыларыны игит ишлерин гёрсетеген «Халкъны эсинде» деген сайтны бетлеринде миллионлар булан саналагъан документлени ерлешдире. Шоланы арасында бизин игитибиз – топчу бёлюкню командири, сержант Къайырбек Мамасиевич Къайырбековну гьакъында да кёп документлер тапдыкъ.

Къ. Къайырбеков 1913-нчю йылда Къаягент районну Гьапкъайгент юртунда тувгъан. Ол асгерге чакъырылып, арадан бир йыл оьтюп, Уллу Ватан дав башлангъан. Шо вакъти ол Совет Заполярьеде 10-нчу гвардиячы атышывчу дивизияны 14-нчю полкунда асгер борчларын кюте болгъан. Ону савгъатлав кагъызларында язылгъан кюйде, оьзю дав окопларда, дав этегенлени ал сыдыраларында 4 йыл – 22-нчи июндан тутуп, 1945-нчи йылны май айы битгинчеге болгъан.
Оьзюню игитлиги учун Къ. Къайырбеков 1942-нчи йылны июн айыны 25-нде «Къоччакълыгъы учун» деген медаль булан савгъатлангъан. 1943-нчю йылны октябр айыны 17-синде орден булан тенглешдирилеген сыйлы медаль топну командирини заместителине экинчи гезик тапшурулгъан. Савгъат кагъызда сержантны игитлиги гьакъда булай язылгъан: «1943-нчю йылны февраль айыны 24-нде полкну разведчиклерини бёлюгюню душман булан болгъан тартышывуну вакътисинде топну командирини заместители Къ.Къайырбеков гючлю атышывлагъа да къарамай, немис фашистлени пулемётдан атышагъан ерин дагъытмагъа бажаргъан. Шо гюнлерде Къа­йырбек Мамасиевич Коммунист партияны сыдыраларына да къабул этиле».

1945-нчи йылны февраль ­айыны 24-нде атышывчу ротаны алгъа барыв гьужумун якълай туруп, Къ.Къайырбековну топчулары душманны уллу пулемётдан атышагъан ерин дагъытгъан. Арадан бир жума оьтюп, 1945-нчи йылны март айыны 2-синде сержант Къа­йырбек Къайырбеков топчулары булан темиркъазыкъ-гюнтувуш бойдан таба Руммельсбург шагьаргъа ювукълашалар. Биринчилерден болуп шо шагьарны ичине гирелер, немис-фашист елевчюлерден азат этелер. Хапарсыз чапгъыныны натижасында немис-фашистлени уллу тобун ва автомашинин яллатгъан. Шо саялы игит уланыбызны 2-нчи Белорус фронтну командованиеси 1945-нчи йылны март айыны 25-нде чыгъаргъан буйругъу булан Макътавлукъну 3-нчю даражалы ордени булан савгъатлай.

Мартны 31-нде Къайырбековну топчулары душманны къатты тартышывлар булан тайышагъан уллу бёлюгюне къаршылашалар. Тенгсиз ва къанлы ябушув башлана. Давну ахырынчы гюнлеринде оланы кёплери жанларын къурбан этелер. Авур яралангъан топну командирин дав къурдашлары, командирлери госпитальгъа тез етишдирелер. Шолай гьаракат врачлагъа игит топчуну аякъгъа тургъузмагъа ёл ача.

Къ. Къайырбековну къанлы давдагъы игитлиги фронтовиклени арасында лап къыйматлылардан саналагъан Къызыл Юлдуз орден булан белгилене.

Уллу Уьстюнлюкню гюнюн игит топ атышывчу Къайырбек Мамасиевич Къайырбеков фронт госпитальда къаршылай. Шонда огъар «Совет Заполярьени якълавчусу» ва «Уллу Ватан давда Германиядан 1941-1945-нчи йылларда уьст болгъаны учун» деген медаллары тапшурула.
Къ. Къайырбековну дав орденлерине ва медалларына 1985-нчи йылны апрель айыны 6-сында бирдагъы белги – Уллу Ватан давну 1-нчи даражалы ордени къошула.
Уьстюнлюк къазангъан игит топчу, коммунист Къайырбек Къайырбеков Къаягент районгъа къайта ва пенсиягъа чыкъмагъа оьмюрю етишгинчеге районну гьар тюрлю къурумларында чалыша.