Огь Москва, сагъа къарап ким тойгъан,

Жанымдан да аявлусан сен магъа.

Сенден таба дёрт де якъгъа узалгъан,

Темир ёллар ошай юрек бавлагъа.

Темир ёл транспортну къуллукълары бизин яшавубузда пассажирлени ва юклени ташывда айрыча ерни тута. Россияда биринчи поезд 1837-нчи йылда Санкт-Петербургдан Царскоселькое деген станциягъа гелген болгъан. Шо гюн- бугюн темир ёл транспортну имканлыкъларындан пайдаланывгъа пачалыкъны янындан айрыча тергев бакъдырыла.

Темир ёл къуллукъчуланы гьюрметине Россияда август айны биринчи къаттыгюнюнде касбу байрам гьисапда гьар тюрлю шатлыкъ чаралар оьтгериле. Бир миллиондан да кёп темир ёлчулар – гьайдавчулар, вагончулар, начальниклер ва оьзгелери шо гюн арадан оьтген вакътини ичинде етишилген уьстюнлюклени гёзден гечире, гележекге байлавлу борчлар къабул этилине. Лап да лайыкълылар материал ва ругь якъдан иштагьландырыла.

Бугюнлерде темир ёлчуланы касбу байрамыны алдында бизге Избербаш шагьарны темир ёл станциясыны начальниги, гьюсемегентли Абдулмалик Магьамматов булан гьакълашмагъа имканлыкъ болду.

– Избербаш темир ёл станция 1925-нчи йылда къурулгъан, – деди Абдулмалик Абдулгьамитович. – Арадан оьтген вакътини ичинде пассажирлени ва юклени ташывда гёрмекли натижалар къолда этилинген. Совет девюрде Избербаш станциядан таба уьлкебизни гьар тюрлю бойларына юрт хозяйство маллар ва къаранап ташыла эди. Оьзге регионлардан буса промышленный ва къурулуш маллар Избербаш станцияда уллу оьлчевлерде къотарылгъан ва ерли къоллавчуланы онгайы учун пайдаландырылгъан. Бизин агьлюбюз оьз оьмюрюн темир ёлчуланы саниятына багъышлагъан. Атам Абдулгьамит, эсделиги ярыкъ болсун, оьзюню касбусун бизге тапшурду. Агъам Артур да – Магьачкъала темир ёл станцияны Шамхалдагъы бёлюгюню башчысы. Ат туягъын тай басар деген кюйде, бизге атабыздан варисликге къалгъан касбугъа бизге де намуслу кюйде янашмакъ – сыйлы борч.

Ер юзюндеги топуракъланы алтыдан бир пайы Россияда ерлешегени белгили. Гертиден де, уьлкебизни баш темир ёл станциясы Москвадан якъ-якъгъа багъып узалгъан. Шо да яшавлукъ-экономика масъалаланы ёрукълашдырывгъа ёллар ача. Бизге де, темир ёлчуланы сыйлы гюню булан къутлай туруп, олагъа гележекде аманлыкъ булан савлукъ ва яхшы ёл ёрамакъ къала.