Халимбекавуллулар Муслим Килясхановну, биринчилей, бек билеген доктор гьисапда таный. Ата юртунда бу сыйлы касбуну юрютегенли, 35 йылдан да артыкъ бола. Ол – яшланы доктору. Дагъыстан Республиканы ат къазангъан врачы. ДР-ни савлукъ сакълавуну отличниги, оьр даражалы врач. Балики, юртлуларындан кюйсюзлюгюне кёмек излеп ону алдына гелмеген яш яда уллу да ёкъдур…
1990-нчы йылда Халимбекавул юртда участка больница ачылгъан. Шо вакътиден берли ону баш врачы болуп Муслим Килясханов ишлей. Ону булан ёлугъуп лакъыр этегенде, ерли больницаны биринчи къыйыны – ерлешген бинасы кёп алдагъы йыллар ишленгени саялы, эсги болгъаны ва юртдагъы савлукъ сакълав идарагъа янгы бина тарыкъ экенни англайсан.
– Оьзге кантыбыз ёкъ. Бары да затгъа амал болажакъ эди, ерлешген ерибиз тыгъыс. Эсги бина, щитовкадан да къолайсыз, нечакъы ремонтлар этип турабыз, – дей ол.
Халимбекавулдагъы участка больницаны янгы бинагъа яда оьзге бинагъа чыгъарма тарыкъ деген масъала гётерилегенли кёп йыл бола. Ерли медицина къуллукъчулар да шолай умут эте. Балики, шо умут яшавгъа чыгъарылар?..
