Юрт - оьсювню ёлунда

Къаягент – Дагъыстанда лап уллу юртланы бириси. Артда оьтгерилген гьисап язывлагъа гёре мунда 15 минг 550 адам яшай. Юртлулар аслу гьалда авлакъчылыкъ ва ону булан тыгъыс байлавлу юк ташывлар булан машгъул. Халкъны ишге къуршав, агьлюлерин сакълавда кёмеклешив, тийишли яшав шартларын яратыв – бугюн ерли администрацияны алдында токътагъан жаваплы иш.

Ондан къайры, юртну ичинде тазалыкъны болдурувну, ярыкъландырывну, табиат газ тартывну, ял алыв ерлерин онгарывну масъалалары да артгъа салынмай гьар гюн чечилме тюше. Къаягент райондагъы мухбирибиз Магьамматрасул Ибрагьимов бир нече гюн алда юрт администрацияны башчысы Анвар Гьюсейнов, ону заместители Шамил Байрамбеков, юрт депутатланы жыйыныны председатели Рашит Макъсутов булан ёлугъуп, шо гьакъда лакъыр этген.