Къазанышлы Татам Хизриевни юртлулары, районлулар да огъар «бухгалтер Татам» деп айтса да, биринчилей, Уллу Ватан давну ортакъчысы деп таный эди. Ол 1922-нчи йылны март айыны 20-сында Буйнакск районну Тёбен Къазаныш юртунда тувгъан.
Орта школаны битдиреген йыл дав башланып, ата юртдагъы «Къызыл Октябр» деген колхозда учётчик болуп ишлеме борчлу бола. Тек артындагъы 1942-нчи йылны башында ону армиягъа чакъыра.
Асгерге алынгъан яшланы давгъа элтеген эшалону Магьачкъала шагьардан чыгъып битгинче, Татамны анасы гечинип, ону шо инг ювукъ адамын гёммеге Къазанышгъа къайтарып йибере. Анасына 40 йыл бола болгъан. Ол уланы давгъа гетегенге къыйналып, юреги авруп гетген.
Алгъасап оьтгерилген тазиятдан сонг Татам Хизриев Моздок шагьарда 316-нчы дивизиягъа тюше. Онда дав асгер къуллукъну башлай. Хыйлы давларда ортакъчылыкъ эте. Шо вакъти огъар 20 йыллар бола болгъан.
1943-нчю йылны октябр айыны 3-нде, Таман ярыматавну душманлардан азат этмеклик учун юрюлеген авур давланы вакътисинде Татам Хизриевни бутуна яра тие. Ону башлап Краснодар шагьаргъа, сонг Сочидеги асгер госпитальгъа йибере. Онда 6 ай ята. Докторлар 4 керен ярасына операция эте, тек сав этме болмай. Ол давдан экинчи группалы сакъат болуп къайта.
Татам Хизриев «Къызыл Юлдуз», «Ватан давну» биринчи, экинчи даражалы орденлери ва онгъа ювукъ медаллар булан савгъатлангъан. «Кавказны якълагъаны учун» деген медаль огъар СССР-ни Оьр Советини 1944-нчю йылны май айыны биринде къабул этилген указына гёре тапшурулгъан.
Тёбен Къазаныш юртгъа къайтгъанда, оьзю давгъа гетгинче иш башлагъан «Къызыл Октябр» колхозгъа гелип, учётчик, сонг бухгалтер болуп загьмат ёлун давам эте. 1960-нчы йыл ол Тёбен Къазанышда бухгалтер-экономист болуп ишлеме башлай. 1963-нчю йыл ондагъы Орджоникидзени атындагъы колхозну бухгалтери болуп ишге тюше. Шо колхозну «Къазаныш» совхозгъа айландыргъанда, ону баш бухгалтери этип белгилеген.
Артда да ол Буйнакск пассажир автопредприятиени, Буйнакск ПМК-ны баш бухгалтери болуп ишлей. Ондан сонг Оьр Къазанышдагъы «Уллусув» совхозну баш бухгалтери болуп чалыша. 1983-нчю йылдан тутуп, Татам Хизриев «Овцевод» деген хозяйствоара предприятиени баш бухгалтери этилип белгилене. Сонг «Къазаныш» совхозну баш бухгалтери болуп ишлеген. 1988-нчи йыл оьзю сююп ишден тая.
Къазанышлылар Уллу Ватан давну ортакъчысы, «бухгалтер Татамны» ата юртунда таза яшап гетген яхшы хасиятлы адам деп таный эди.
