Юртдагъы участка больницасында аврувлар ятма болагъан ерлени санаву 10 тюгюл ёкъ. Гиччи буса да, больница гьалиги заманны талапларын кюте. Ону ичине гиргенде биз больницаны баш врачы Магьамматгьажи Муслимов булан ёлукъма болмадыкъ. Ол район центргъа гетип ёкъ эди.

 

Баш медсестра, савлукъ сакълавну ат къазангъан къуллукъчусу Адай Муслимованы иш сынаву – 54 йыл. Ол англатгъан кюйде, больницада гьарисинде бешер адамгъа ятма ери булангъы терапия ва яшланы бёлюгю бар. Магьамматгьажи Муслимов терапия аврувлагъа къарай. Ондан къайры да, бу больницада бирдагъы врач-педиатр ишлей. Ону аты – Сакинат Гьапизова.

Адай Муслимова дагъы да англатгъан кюйде, больницагъа Дейбук, Первомайск юртлардан гелегенлер де бола. Больница гиччи буса да, адамланы къуллугъун кюте. Кант этме себеплер ёкъ. Медперсонал да, аврувлар да шолай ойлаша.

Ерли участка больницаны баш врачы болуп 30 йылланы узагъында Шапи Къанболатов ишлеген. Юртну халкъы учун гьалал къуллукъ этген доктор «Дослукъ» ордени булан да савгъатлангъан.

 

 

Суратда: баш медсестра

Адай Муслимова.