Халисат Агьматова Яхсай юртдагъы 2 номерли школада муаллим болуп ишлейгенли, 40 йыл бола. Ол математака дарсланы юрюте. Онунчу класны ёлбашчысы да дюр.
Ону булангъы лакъыр яшланы тарбиялав ёлда клас ёлбашчы не йимик гьаракат юрютме тарыкъ экенини гьакъында эди. Халисат Солтановна магъа англатгъан кюйде, класны ёлбашчысы болгъан сонг, ол яшлагъа берилеген тарбияны ата-анасыдай жаваплыкъда кютме тарыкъ. Неге тюгюл, яшлар ата-ананы алдында йимик кёп заманын муаллимлени алдында да оьтгере.
– Гьалиги яшланы учителлеге четим не аваралары бар? – деп сорайман Халисат Солтановнагъа.
– Гьалиги яшлар, бизин гиччи заманларыбыз булан тенглешдирсе, англав янындан кёп алгъа гетген. Олар Интернетден таба боламы яда «мультфильмлеге» кёп къарайгъан саялы боламы, билмеймен, бек англавлу, итти. Олар булан ишлеме къыйын, неге тюгюл оланы дюньягъа къараву тамашагъа къалдыра. Уллулар англамайгъан, эс этмейген мюгьлетлени де гьалиги яшлар тутма бола. Предметни айтмайман. Бола чы яшавдагъы бир-бир эслеп къарагъанда ойлашдырагъан ерлери, – дей ол, сонг бираз ойлашып: –Гьалиги яшланы телефонлар да кёп затгъа уьйрете, – деп магъа багъып тергевлю къарады ва илиякълы иржайды.
– Гьалиги яшлар охума сюймей деп айтма болмайман, – деп узата сёзюн Халисат Агьматова. – Он бешинчи йылда чыгъаргъан класым бар эди, 22 яшдан бешевю медицина университетге тюшдю. Сегизи Ессентукидеги медколлежни битдирип гелди.
Муаллимлени касбусу, озокъда, жамият учун инг тарыкълы къуллукъ экенни олар оьзлер бек яхшы англай. Алапалары аз экени бирлеринде ишге муштарлылыкъны тайдыра буса да ярай. Тек Халисат Солтановна йимик оьз ишин юрегинден сююп билеген дарс беривчюлер булан аз замангъа да ювукъдан таныш болсанг, оланы касбусуна бакъгъан янашыву гьакъ юрекден гелегенине тюшюнесен. Шо буса бизин яшлар гьар даим де билим алыв гьаракатын узатажагъына инандыра.
