«Мени гиччи Ватаным» деген ат булан Ёлдашны бетлеринде чыгъагъан макъалаланы арасында загьматны ветераны къаягентли Сайит Гьажиевич Мирзаевни гьакъындагъы макъала айрыча ерни тутажагъына инанаман. Оьзюню узакъ, бай ва оьктемликге тийишли яшав ёлу булан ол гьар-бирибизге уьлгю болуп токътай.
Сайит Гьажиевич 1933-нчю йылда Къаягент юртда тувгъан. Ону яшлыгъы элибизге гелген лап къыйынлы Уллу Ватан давну йыллары булан раслашгъан. Амма яшлыгъына да къарамай, давну авур йылларында, намусдан къачмагъан ва загьматдан ариде турмагъан, болагъаны йимик уллулагъа кёмек этген, къыйынны-тынчны олар булан пайлап алгъан.
Четимликлени себеп этип, билим алывдан, охувдан да айрылмагъан. 1951-нчи йылда ерли орта школаны 10 классын битдирген. Шо йыл Буйнакскидеги бавчулар гьазирлейген бир йыллыкъ школаны охуп битдирген ва агроном касбугъа ес болгъан. 1952–1955-нчи йылларда йыракъ Германияда асгер борчларын намуслу кютген. Къайтгъаны булан ерли «Сталин ёлу» деген колхозну авлакъчылыкъ бригадасына бригадир этилип белгиленген. Бир ишде, бир хозяйствода 41 йыл ишлеген.
1966-нчы йылда колхозну орнунда «Къаягент» деген совхоз къурула. Хозяйство юзюмчюлюкге гёче. Оьзгелер йимик Сайит Гьажиевич де бригадасы булан биринчилерден болуп юзюм бавлар орнатмагъа, юзюмчюлюкню сырларын уьйренмеге башлай. Аз заманны ичинде жагьил бригадир юзюмчюлери булан гёрмекли уьстюнлюклеге етишмеге бажара. Емиш береген юзюм бавланы гьар гектарында орта гьисапда 100-120 центнер татли емиш оьсдюре ва тас этмей барысын да къайтара. Ону ва бригадасыны атлары хозяйствода тюгюл, савлай Къаягент районда да алдынлыланы арасына гире, республикада белгили бола. Шо йыллардагъы къайратлы загьматы учун С.Мирзаев Октябр Революция, Загьмат Къызыл Байракъ ва 2 керен «Загьмат Белгиси» деген орденлер булан савгъатлана. Ону тёшюн 7 медаль безей. Етишген уьстюнлюклери саялы огъар «Дагъыстанны айтылгъан юзюмчюсю» деген сыйлы ат берилген.
Бугюн ветерангъа 87 йыл бола. Йылларына да къарамай, ол юртну жамият яшавунда ортакъчылыкъ эте. Гьюрметли тамазаны къаягентлилер юртну жамият советине сайлагъан. Советни оьзге ортакъчылары булан ол юртну, юртдан ягъада адамланы арасында болагъан яман ишлени токътатмакъ ва алдын алмакъ учун кёп гьаракат этип чалыша, яшёрюмлер булан ёлугъа ва насигьатлар бере.
Сайит Гьажиевич чакъ-чакъда «Къаягент» деген пачалыкъ унитар предприятиеде де къонакълыкъда бола. Иш коллективде оьзлени айтылгъан бригадирин, давну ва загьматны ветеранын унутмайлар.
Сайит Гьажиевич 3 уланны ва 3 къызны атасы да дюр. Оланы гьарисин аякъгъа тургъузгъан, билимлер берген, тарбиялагъан, элибизге пайдалы адамлар этип оьсдюрген. Не ерде болса да, оланы гьариси ата-анасына ва белгили уллу атасына ошавлу адамлар болуп оьсежегине бир де шекленмеймен.
Магьамматрасул ИБРАГЬИМОВ
