Алдын йимик йыракъда яшайгъан дос-къардашына, таныш-билишине кагъыз язагъанлар кёп болмаса да, юртларда иш гёреген почтаны бёлюклерини ишини агьамиятлыгъы бугюнлерде де кем болмагъан.
Артдагъы 5 йылны узагъында Дёргелидеги почта бёлюгюню ёлбашчысыны къуллукъларын кютеген Умуят Жанатлиева айтагъангъа гёре, Интернетни ва байлавлукъну оьзге къайдалары оьсюп яйылгъан буса да, оьзлени къуруму кютеген къуллукълар булан пайдаланагъанлар да разилигин билдире.
Артдагъы вакътилерде почта байлавлукъну ишинде бир тюрлю алмашынывлар да болуп тура. Дёргелидеги почта бёлюгю де оьзюню ишинде адатлангъан мердешлер булан бирге янгы къайдаланы да генг кюйде къоллай. Тергевню тартмагъа болагъан янгылыкъланы гьакъында айта туруп, «Почта банк» деген банкны карталарына харжлар йиберивню эсгермеге ярай. Бугюнлерде юртда «Почта-банкны» картасы булан пайдаланагъанланы санаву 300-ден де артыкъ. Шо да эсгерилген банкгъа адамланы инамлыгъы баргъан сайын артагъанын исбатлай.
Шондан къайры да, почта бёлюклери федерал оьлчевдеги бизин республикада иш гёреген къурумларына герекли заманда кёмегин болдуруп геле. Ачыкълашдырып айтгъанда, юртлулар харжлагъан электрик токгъа, табии газгъа тёленеген гьакъ почта бёлюкде жыйыла. Адамлар бир-бирине язагъан кагъызлар болмаса да, налог, пенсия, суд ва оьзге къурумлар ватандашлагъа етишдирмеге тарыкълы маълуматланы почта бёлюгюню къуллукъчулары оьз заманында етишдире. Юртлулар язылгъан газетлер булан бирге шо къуллукъну да почтальон къатынлар Дайгибат Мурзаевагъа ва Патимат Изиевагъа кютмеге тюше. Тюзюн айтгъанда, бугюнлерде почтада уллу алапалар берилмесе де, олар оьзлеге тапшурулгъан борчлагъа жаваплы янаша. Газетлеге ва журналлагъа язылывну вакътисинде юртлуланы арасында англатыв иш де юрюте. Чинкдеси, халкъны разилигин къазана.
