Халимбекавуллу Расул Килясханов – 1945-нчи йыл Москвада, Къызыл майданда биринчилей оьтгерилген «Уьстюнлюкню парадыны» ортакъчысы. Ол фашист елевчюлерден Венгрияны, Чехословакияны азат этмек учун юрюлген давларда гёрсетген къоччакълыгъы учун орденлер, медаллар булан да савгъатлангъан.
Расул Килясханов 1911-нчи йылда Халимбекавулда тувгъан. Школаны битген сонг ерли колхозда машин гьайдавчу болуп ишлеме башлай. Шо заман машинлер гьали йимик кёп болмагъан. Савлай юртда бир нече болгъандыр.
Уллу Ватан дав башлангъан сонг Килясхановну асгер къуллукъну кютмек учун уьлкени инг де йыракъ Япония булангъы дазусуна йиберелер.
1942-нчи йылны январ айындан тутуп, ону кавалерия эскадронгъа пулемётчик этип белгилей. Шо йылны март айындан 1943-нчю йылны март айы болгъунча ол авторотада къуллукъ эте. 43-нчю йылны язбаш айларында оланы Москва бойгъа гелтире ва ол танк бригадада къуллукъ этме башлай. Шо йыл яраланып, госпитальгъа тюше. Сав болгъанда, 453-нчю атышыв полкда снайпер болуп 1945-нчи йыл болгъунча фронтда душмангъа къаршы ябуша. Венгрияны, Чехословакияны, Будапештни, Праганы немислерден азат этмек учун юрюлеген давларда ортакъчылыкъ этген. Сталинден «Баракалла кагъыз» алгъанындан къайры да, ол «Макътавлукъну» эки ордени ва эки «За Отвагу» медаль булан, Ватан давну уьчюнчю даражалы ордени булан, юбилей медаллар булан да савгъатлангъан.
Давдан сонггъу йылларда Расул Килясханов ата юртундагъы совхозда шо алдагъы машин гьайдавчу касбусун юрютме башлай.
