Бай тарихи булангъы школа...

Бай тарихи булангъы школа...

Х.Магьитовну атындагъы 2 номерли Яхсай орта школасында буссагьатгъы вакъти 700-ге ювукъ яш охуй. 2018-нчи йылда школа оьзюню юбилей байрамын оьтгерген. Школаны директору Рашит Ибрагьимов хабарлайгъан кюйде, жыйылгъан къонакъланы арасында республика оьлчевде де белгили адамлар болгъан. Дагъыстанны халкъ шаири Агьмат Жачаев, профессор Забит Акавов, шаирлер Латип Гьажакъаев, Къалсын Акъгёзов ва оьзгелери де тарихи бай Яхсай школасы гетген ва гьалиги яшавуну гьакъында айтгъанлар. Шатлыкъ чараларда Хасавюрт районну башчысы Жанболат Салавов, райондагъы школаланы директорлары да ортакъчылыкъ этген.

 

Озокъда, савлай республикада да олай тезде къурулгъан билим берив ожакълар аз. О вакътилерде Яхсайдагъы орта школада, оьзге юртларда орта билим береген школалар ёкъ экени саялы, гелип охуйгъанлар да болгъан.


– О вакъти Хасавюрт бойда айтылгъан школаны гьалиги гьалы нечикдир? – деп сорайман директоргъа.


– Нечик болсун, яшлар эки сменде охуй, тыгъыслыкъ бар, – дей ол. – Спортзалыбыз ёкъ, бу биз ерлешген бина 1961-нчи йылда къурулгъан. Башлапгъы класлар охуйгъан бина чы 1879-нчу йылда къурулгъан. Янгы школа къурма тарыкъ.


– «150 школа» деген программагъа къошулуп, кюйню алышдырма бажарылмаймы? – деп сорайман директор Рашит Мусаевичге.


–Не болур огъар къошулгъан булан, 2 миллион берер шогъар, о аз акъчагъа не этип бола?.. Янгы школа къурулса, нечакъы да яхшы болажакъ эди, – дей ол.


Нечик алай да, Яхсайда ян­гы школа къурулмаса бажарылмайгъаны англашыла. Школада 96 дарс беривчю бар. Уллу школа. Яшланы санавуна гёре де уллу бина къурма тюшежек.


Район гьакимлигине онча харжны тапма да чы тынч болмай. Республика оьлчевде де шо масъала гётерилер. Ким би­ле, ювукъ арада яшлар булан учителлер де янгы щколаны бинасындан сююнюп, бирдагъы керен ону ачылывуна байлавлу шатлы ёлугъувлар оьтгерме болар деп умут этебиз.