Адамланы савлугъуну гьайындалар

Адамланы савлугъуну гьайындалар


       Гьар больницаны да аслу борчу недир? Аврувгъа бажарывлу кюйде ва заманында кёмек этмек. Шо яндан алгъанда, Яхсайдагъы участка больница оьзюню борчларын кюте деме ярай. Больницада гюнде 125 адамны къабул этип болагъан амбулатория да ишлей ва шонда 35 адамгъа ятма ерлер де бар. Савлай больницада 72 адам ишлей. Олардан 13-вю – врачлар ва 36-ву –медсестралар.

 

1999-нчу йылдан бер­ли, больницаны баш врачы болуп Агьмадулла Казиев ишлей. Ол – сынавлу врач, огъар Дагъыстанны ат къазангъан врачы деген ат да берилген.


– Яхсайдагъы больницада янгыз юртлулар тюгюл, поезд ёлну тюп янындагъы бары да дегенлей юртланы аврувлары, гьатта Бабаюрт райондан да гелип яталар, – дей ол, мени булан лакъыр эте туруп. – Бир къолай болуп, сонг гелегенлер де бола. Бизин больницада аврувланы багъыв­ сан янлы юрюле. Врачларыбыз йыл сайын сынав топлай. Мунда 40 йыллардан да артыкъ ишлеп турагъан акушер-гинеколог Аминат Жамалованы, врачлар йимик билеген медсестралар Зоя Гьажиеваны ва Къурайыш Исаеваны атларын эсгерме сюемен. Бизге врачлар етише. Янгы гелген эки врачыбыз да бар – тиш доктор ва терапевт.


Юртда яшайгъанланы санаву 10 мингден де артыкъ. Шону учун да медицина къуллукъчулагъа бек къаст къылып ишлеме герек, неге тюгюл де бир аврув юртгъа яйылса, шону токътатмакъ учун кёп гюч герек. Юртлу врачлар буса шоланы алдын алывгъа, халкъны арасында англатыв юрютювге, гьар агьлю булан ёлугъувгъа бек агьамият бере.


Биз Агьмадулла булан лакъыр эте туруп, больницаны ичинден юрюйбюз, ол заманда бир аврувлар ятагъан­ палаталагъа гире, ондагъыланы гьалын-кююн сорай.


Юртда кёбюсю юрек аврув булан мунда геле, шолай да ашкъазан-ичек аврувлар, сувукъ тийив аврувлар да кёп бола. Ятагъан ерлер сав йыл бошамай толуп бола. Аврувлар айтагъан кюйде, тарыкълы дарманлар булан олар таъмин этилине.


Йылда юртда 200-ге ювукъ гиччипав тува, олагъа да къаравну яхшылыгъындан бары да сав къала деп айтма да ярай. Муна шулар – больницаны инг де гёрмекли натижалары.


Больницаны ичи йимик къыр яны да арив ярашдырылгъан. Яз булан бирге айланасына да яшыллыкълар ва гюллер орнатылып безендириле.


Юртну уллулугъу врачлагъа шайлы гюч эте, тек мунда кант этегенлер ёкъ, олар учун ингдеси – авруву булан гелгенлени къолай этмек. Эгер де шагьаргъа йиберме тарыкъ буса, тезликде «скорая помощь» чакъы­рыла. Алда, районда «скорая помощь» бар вакътиде, шолай бир машин Яхсай больницада да бола эди. Тарыкъ болгъандокъ, Яхсайда ва шону айланасындагъы юртлардагъы аврувланы уьстюне етишмек учун 20 минут къала эди. Гьали районну ва шагьарны бирикдиргенде, 1 сагьатдан да артыкъ къала.


Мен янгылыкъланы гьакъында сорагъанда, Агьмадулла Казиев сююне туруп, гьалиги янгы медицина программагъа гёре, тездеги юртдагъы больницаны орнунда яшлар учунгъу поликлиника ачылажакъны айтды. Шону ачмакъ булан поликлиника инг янгы аппаратлар булан да ясандырылажакъ. Шо буса къайсы яшны да аврувун башлана турагъанда алдын алмакъ учун имканлыкъ бережек. Аврувну къолай этгенче, ону алдын алмакъ яхшы деп де айтылагъаны герти чи дагъы...